Marketingu ka të bëj me vendosjen e produktit të duhur, me çmimin e duhur, në kohën e duhur dhe në vendin e duhur. Bazat themelore të marketingut janë produkti, çmimi, vendi dhe promovimi. Marketingu është procesi i menaxhimit përgjegjës për identifikimin, parashikimin dhe plotësimin e kërkesave të klientit. Shumë ndërmarrje dhe veçanërisht bizneset e vogla gabojnë kur tentojnë ta organizojnë marketingun e tyre pa u konsultuar me ndonjë ekspert. Ja disa gabime të zakonshme marketingu që bizneset duhet t’i shmangin. Mos përcjellja e performancës Teknologjia moderne ju mundëson të mbani shënime për sjelljen e klientëve tuaj dhe ta përdorni atë në avantazhin tuaj. Fatkeqësisht, shumë biznese i përdorin këto të dhëna për të krijuar fushata marketingu, për të cilat besojnë se do të funksionojnë mirë, por më pas ata nuk arrijnë të gjurmojnë performancën për të identifikuar fushat ku kanë nevojë për përmirësim. Me përdorimin e duhur të teknologjisë dhe aplikacioneve moderne, ju mund të gjurmoni çdo aspekt të fushatave tuaja të marketingut, kështu që mund të përcjellni se ku keni pasur sukses dhe ku mund të përmirësoheni. Dështim në mbajtjen e klientëve ekzistues Në përgjithësi, në biznes, 80% e shitjeve dhe fitimeve vijnë nga klientët ekzistues, ndërsa pjesa tjetër prej 20% vjen nga klientë të rinj që blejnë për herë të parë. Shitja për një klient të ri është më e vështirë sesa shitja për një klient ekzistues, kështu që mos harroni të caktoni disa nga fushatat tuaja të marketingut drejt bazës ekzistuese të klientit tuaj për të marrë shitje të përsëritur. Kësisoj, jo vetëm që do të tërhiqni një audiencë më të gjerë të blerësve të mundshëm, por gjithashtu do të siguroheni që bëni mjaftueshëm përpjekje për klientët aktual dhe ata të rinj. Jo të gatshëm për të investuar Është një pengesë e zakonshme për bizneset e vogla, pasi që ata mund të kenë buxhet, por nuk e investojnë atë në marketing. Në fakt, studimet e fundit tregojnë se në çdo fazë të jetës, pronarët e biznesit dëshirojnë të investojnë më shumë në marketing. Nga viti i tyre i parë në biznes deri në vitin e tyre 20 (ose më shumë) bizneset mesatarisht kanë ndarë 10% të buxhetit të tyre për marketing kur ata dëshirojnë të kishin investuar 25% ose më shumë. Jo të gatshëm të adaptohen Ashtu si njerëzit, bizneset duhet të rriten dhe të evoluojnë nëse duan të kenë sukses. Bizneset që nuk dëshirojnë të përfshijnë teknologji të re, të provojnë platforma të reja ose të eksperimentojnë me audiencë të re kanë pak gjasa të gjenerojnë të ardhura më fitimprurëse në botën e biznesit që është në ndryshim të vazhdueshëm. Kompanitë më të suksesshme bëjnë gjithçka që munden për të përshtatur strategjitë e tyre të marketingut për të akomoduar prirje të ndryshme, si dhe për të arritur perspektiva të reja. Duke eksperimentuar me kanale të ndryshme të rrjeteve sociale ose strategjive dhe teknikave të marketingut, mund të arrini një audiencë më të gjerë dhe të maksimizoni fitimet tuaja të mundshme.Si ta promovoni më mirë biznesin tuaj? E vërteta është se ne të gjithë jemi të bombarduar me mesazhe për shitje pothuajse çdo ditë. Ne vazhdimisht shohim reklama në lidhje me produktet dhe shërbimet që bizneset ofrojnë dhe pse ne duhet t'i blejmë ato. Normalisht që  duhet të flisni fare për produktin ose shërbimin tuaj, por është e rëndësishme të keni një imazh të qartë për marketingun tuaj. Përmes shërbimeve efikase ju duhet t’i tregoni klientëve tuaj pse ata duhet të vazhdojnë që t’ju besojnë. Këtu janë disa mënyra për të tregtuar në mënyrë të hollësishme ekspertizën tuaj dhe biznesin e përgjithshëm sesa përqendrimi vetëm në produkte/shërbime.Theksoni industrinë tuaj. Reklamoni biznesin tuaj në rrjete sociale duke treguar për shërbimet/produktet që ofroni, poashtu shkëmbeni këshilla me njerëzit që kërkojnë informacione për industrinë tuaj.Flisni për programet e biznesit tuaj. A keni një program që shpallni punonjësin e muajit dhe a jeni duke investuar në trajnime dhe ngjarje për ndërtimin e ekipit? Ndoshta ju sponsorizoni një ngjarje në komunitet ose një ekip sportiv. Të gjitha këto janë arsye pse një klient mund të dëshirojë të bëj biznes me ju, prandaj mos hezitoni të flisni për programet tuaja se si përkrahni zhvillimin e punonjësve tuaj me anë të trajnimeve të ndryshme.   Vlerësoni klientët tuaj. Kjo është aq e thjeshtë sa shpërndarja e një rekomandimi ose rishikimi. Shfrytëzoni rastin të falënderoni personin që mori kohë për t'ju dhënë një vlerësim në rrjetet sociale dhe t’i tregoni se sa e rëndësishme është për ju kur një klient ndahet i kënaqur me shërbimet/produktet tuaja./AkademiPune

Përderisa punojmë në ekipe dhe krijojmë kampanja të reja nëpër rrjetet sociale, poashtu mundohemi që ta kryejmë punën tonë në mënyrë sa më efikase. Përdorimi i aplikacioneve moderne është i domosdoshëm nëse dëshirojmë që puna jonë të ketë paraqitje sa më të mirë. Këtu është lista e aplikacioneve që mund t’i përdorni nëse punoni në menaxhimin e rrjeteve sociale që përveç se lehtësojnë punën tuaj, janë poashtu mjaft të lehta për tu përdorur. 1. Buffer Me karakteristika të fuqishme planifikimi tërheqëse dhe moderne në pothuajse të gjitha platformat e rrjeteve sociale Buffer është njëri nga aplikacionet më të dobishme për organizimin e kalendarit tuaj të rrjeteve sociale. Ju mund të keni qasje në Buffer gjithashtu edhe përmes telefonit tuaj dhe t’i organizoni postimet tuaja nëpër platforma. Buffer gjithashtu siguron analitikë duke përdorur analitikat e saj mbi veprimtarinë e arritur nga miliona postime, siç janë ditët dhe periudhat kur është ideale për të postuar. 2. BuzzSumo BuzzSumo është një aplikacion inovativ i rrjeteve sociale që ju ndihmon të kuptoni për materialet që janë më atraktive nëpër platforma të ndryshme. Për menaxherët e rrjeteve sociale ky aplikacion gjithashtu ju lejon të shihni se në cilat fusha ka interesim në tema të caktuara, duke ju lejuar të përsosni strategjinë tuaj bazuar në informatat që merrni rreth trendeve të fundit. 3. Analytics Ky aplikacion luan një rol të rëndësishëm në vendimmarrje në botën e rrjeteve sociale. Analytics ju ndihmon të kuptoni sjelljen e audiencës tuaj, performancën e postimeve tuaja, demografinë dhe krahasimin e të dhënave me periudhën e mëparshme. E gjithë kjo mund të bëhet manualisht përmes faqeve të analytics në Twitter, Instagram, Facebook, Pinterest dhe Linkedin ose mund të automatizohet për të parë raporte domethënëse të konsoliduara. 4. Unsplash Nëse keni vështirësi të gjeni foto me rezolucion të shkëlqyer për t'ja bashkangjitur materialeve tuaja, Unsplash është një platformë me fotografi në internet që është krijuar nga mbi 100,000 fotograf profesionist nga e gjithë bota. Më saktësisht, ky Unsplash ju mundëson të shkarkoni, modifikoni, shpërndani dhe përdorni fotografi nga platforma e saj falas. Ky aplikacion përmban më shumë se 690,000 imazhe që mund t'i përdorni për qëllime të ndryshme tregtare apo për reklamim. 5. Canva Nëse jeni një ekip i vogël dhe ju pëlqen të kontrolloni veprat artistike që dalin në rrjetet tuaja sociale, Canva është zgjidhja për të gjitha nevojat tuaja të dizajnit grafik. Ky aplikacion është aq i thjeshtë sa që me vetëm disa klikime ju jeni në gjendje ta shfaqni kreativitetin tuaj. Canva ofron modele në rezolucione të sakta siç kërkohen nga rrjetet specifike sociale. 6. Easil Edhe pse Easil është pothuajse i ngjashëm me Canva. Ky aplikacion ka dizajne të mahnitshme për storje në Instagram që ju mundëson krijimin e dizajneve mjaft atraktive. Easil ofron mundësi të sofistikuara që janë të lehta për qasje. 7. CloudApp CloudApp është një regjistrues ekrani i lehtë për t’u përdorur që ju ndihmon të krijoni regjistrimin e videos HD, të përdorni kamerën në internet në regjistrimet e ekranit tuaj, të ruani fotografi të ekranit, si dhe të krijoni GIF-s kreative që t’ja bashkoni publikimeve tuaja. 8. Clocker Për një biznes, është e rëndësishme që postimet tuaja të dalin kur audienca juaj është më së shumti aktive. Clocker është një aplikacion për MacOS që ju lejon të monitoroni zona të shumta kohore. Zgjidhni kohën tuaj lokale, shkruani zonat kohore që dëshironi të gjurmoni dhe përdorni Future Slider për të kontrolluar dhe aranzhuar kohën tuaj lokale me kohën që dëshironi të postoni për rajone të veçanta./AkademiPune

Ndiheni sikur keni dhënë gjithçka nga vetja në kërkim të një pune, mirëpo përkundër përpjekjeve tuaja të njëpasnjëshme, për ndonjë arsye cilado qoft ajo ju nuk mund të gjeni një punë. Është vërtetë zhgënjyese, ndoshta edhe situatë e sikletshme për ju, megjithatë nuk duhet të dëshpëroheni. Ju duhet të bëni çmos për të mbajtur shpresën dhe të qëndroni të motivuar, pasi kjo është mënyra më e mirë duke refuzuar të dorëzoheni. Ja çka duhet të ndërmerrni nëse jeni duke pasur vështirësi në gjetjen e një pune:  Bëni kërkimin e punës top prioritetin tuaj Së pari, gjetjen e një pune të re duhet ta listoni si prioritet kryesor. Është e rëndësishme t'i përcaktoni qëllimet ditore, javore dhe mujore. Kjo do t'ju ndihmojë të qëndroni në hap me kohën edhe nëse ende nuk e keni gjetur një vend pune. Nëse dëshpëroheni kur aplikoni për ndonjë pozitë pune dhe nuk merrni ndonjë ofertë, kërkoni nga dikush të shikojë CV-në tuaj, si dhe kërkoni këshilla nga miq apo ndonjë ekspert rreth CV-së dhe intervistave të punës. Ndryshoni formën e të menduarit Është e vërtetë se mund të ndjeheni të lodhur nëse kërkoni punë për një kohë të gjatë dhe ende nuk keni ndonjë rezultat. Ndoshta ju nuk po bëni përpjekjen e duhur në secilin aplikacion për punë. Apo ndoshta keni mendime negative si: "Unë nuk do ta marr atë pozitë pune gjithsesi, kështu që pse të bezdisem të shkruaj një letër motivimi të re?" Me këso qëndrimesh demotivuese normalisht që zvogëlohen gjasat që ta fitoni vendin e punës për të cilin keni aplikuar. Prandaj,  mundohuni ta shtoni entuziazmin dhe vetëbesimin tuaj për secilën punë për të cilën aplikoni. Takoni sa më shumë njerëz Rrjetëzimi është i domosdoshëm për karrierën tuaj.  Mund edhe të jetë e vështirë të "shesësh" veten për secilin person që takon në ndonjë event, mirëpo rrjetëzimi mbetet akoma një nga mënyrat më të mira për të takuar njerëz të rinj dhe për të gjeneruar drejtime të reja. Rishikoni CV-në tuaj Ju duhet të kujdeseni që CV-ja juaj të jetë e përditësuar dhe t'i përfshijë informatat e kërkuara për pozitat e punës ku aplikoni. Preferohet t'ja dërgoni CV-në tuaj dikujt për shqyrtim përpara se ta dorzoni atë për aplikim për punë.  Ky person mund të jetë një anëtar i familjes, mik apo ekspert që mund të shikojë CV-në tuaj dhe t'ju njoftojë nëse ka ndonjë gabim të mundshëm që ka nevojë të korrigjohet. Praktikoni aftësitë tuaja të intervistimit (Lexoni artikullin → këshilla rreth intervistave të punës nga profesionistë kosovarë) Paraqitja që bëni në intervista të punës ndikon drejtërdrejt në vendimin e intervistuesve nëse do t'ju përzgjedhin apo jo. Kjo është arsyeja pse ju duhet të përpiqeni të përmirësoni aftësitë tuaja të intervistimit. Ju mund të praktikoni me anëtar të familjes apo miq, të cilët mund të jenë në gjendje të ofrojnë këshilla se çfarë po bëni mirë si dhe ku keni nevojë për përmirësime. Nëse keni një shef të dikurshëm me të cilin jeni miq, mund t'i pyesni nëse mund të bëjnë një intervistë testuese me ju. Në këtë mënyrë, kur të vie koha e intervistës, do të jeni më të përgatitur./AkademiPune

Pandemia dhe pasojat e saj do të jenë një nga sfidat më të mëdha të biznesit të kohës sonë. Për të vazhduar operacionet duke minimizuar rrezikun për punonjësit, shumica e kompanive kanë përshtatur mënyra të reja të punës nga shtëpia varësisht nga natyra e punës.Askush prej nesh me të vërtetë nuk e di se si do të duket jeta jonë kur gjërat fillojnë të kthehen në "normalitet". Një gjë duket e sigurt, puna do të duket ndryshe për një kohë.Punëdhënësit dhe menaxherët mbajnë përgjegjësinë kryesore për të drejtuar kompanitë e tyre përmes kësaj kohe. Varet nga ata që të përcaktojnë se si dhe kur të fillojnë detyrën komplekse të kthimit në vendin e punës pasi të jenë larguar në tërësi kufizimet e qeverisë.A do të praktikohet distanca sociale? Shëndeti dhe siguria e punonjësve duhet të jetë prioritet i kompanive. Kjo natyrisht se është një shqetësim moral, etik dhe ligjor për të gjitha kompanitë. Nga këndvështrimi i biznesit, mbrojtja e mirëqenies së punonjësve është thelbësore sepse asnjë plan për të rifilluar operimet normale nuk mund të ketë sukses pa ta. Punonjësit padyshim se llogarisin në kompanitë e tyre për t'i ndihmuar të rikthehen në punë pa rrezikuar shëndetin e tyre. Përderisa kufizimet e lëvizjes po zbuten, kompanitë do të duhet të kuptojnë dhe zbatojnë pajtueshmërinë me urdhrat e pushtetit lokal si dhe atij qendror. Meqenëse këto rregulla ndryshojnë sipas vendndodhjes dhe ndoshta nuk do të jenë të aplikueshme njëzëri, drejtuesit e kompanive duhet të planifikojnë një varg metodash bazuar në natyrën e punës dhe vendin ku zhvillohet puna. Tranzicioni nga puna prej shtëpisë në atë nga zyrja Si punëdhënësit ashtu edhe punonjësit nuk do ta kenë të lehtë deri sa të stabilizohen dhe t’i kthehen punës siç ka qenë para përhapjes së pandemisë. Ja disa këshilla se si menaxherët mund të përballen me këtë ndryshim: Keni durim dhe fleksibilitet. Ka gjasa që ekipi juaj të ndihet i stresuar, qoftë për t'u rikthyer në zyrë ose për sfida më të përgjithshme, të shkaktuara nga pandemia. Ndihmoni dhe inkurajoni ekipin tuaj që ta ketë sa më të lehtë ta rifillojë punën. Krijoni një plan të detajuar. Punonjësit tuaj duan të dinë se çfarë të presin në të ardhmen. Krijoni një plan që përshkruan në detaje se si do të vazhdojnë detyrat në terma afatshkurtër dhe afatgjatë. Bëni këtë plan të disponueshëm për ekipin tuaj dhe përgjigjuni pyetjeve që mund të kenë ndaj jush. Vendosni pritshmëri të qarta për udhëzime dhe rregullore të reja. Sigurohuni që ekipi juaj të jetë i vetëdijshëm dhe t'i përmbahet masave të sigurisë dhe rregullave të reja. Ato duhet të komunikohen qartë dhe rregullisht në mënyrë që të gjithë të jenë të përditësuar me informatat e fundit. Si duhet të përballen punonjësit me situatën e re?Mos nxitoni nëse nuk jeni gati fizikisht ose emocionalisht. Siç diskutuam më lart, ekzistojnë arsye të ndryshme që mund t'ju bëjnë që ende mos jeni në gjendje të ktheheni në punë brenda zyrës. Komunikoni me menaxherin tuaj ose departamentin e HR për të diskutuar një plan veprimi të përshtatshëm. Qëndroni të kujdesshëm kur bëhet fjalë për procedurat e reja të sigurisë. Mos u shqetësoni për praktikat higjienike të sugjeruara. Ju jeni më të sigurtë përderisa vazhdoni t’i zbatoni rregullat si mbajtja e distancës dhe higjienës. Komunikoni qartë dhe shpesh. Sigurohuni që ju dhe menaxheri juaj keni komunikim të vazhdueshëm në lidhje me nevojat tuaja të punës. Nëse gjatë kësaj kohe keni nevojë për fleksibilitet mos hezitoni ta njoftoni. Thënja se ne jemi të gjithë së bashku kundër kësaj pandemie është përmendur disa herë, prandaj duhet të vazhdojmë ta përkrahim njëri tjetrin që ta tejkalojmë këtë situatë kritke. Mbështetuni në rrjetin tuaj të njerëzve dhe burimeve për t'ju ndihmuar ta keni sa më të lehtë kalimin përsëri në zyrë./AkademiPune

Forca e brendshme që ju shtyn të provoni gjëra të reja, t’i arrini qëllimet e juaja si dhe dëshira për ta përmirësuar jetën tuaj njihet si motivim. Mund të motivoheni nga të tjerët, por edhe ju personalisht jeni akteri kryesor për vetë-motivim. Motivimi mund të ndahet në dy nën-kategori që janë motivimi i brendshëm dhe ai i jashtëm. Motivimi i brendshëm është kur jeni i apasionuar pas punës tuaj dhe merrni kënaqësi ekstreme nga ajo. Ndërsa motivimi i jashtëm i referohet sjelljes që nxitet nga shpërblimet e jashtme si paraja, fama, notat dhe lëvdatat. Ky lloj motivimi lind nga jashtë individit, në krahasim me motivimin e brendshëm, i cili e ka origjinën brenda individit. Pse është e rëndësishme ta mbani veten të motivuar në vendin e punës? Motivimi ju duhet për të ndërtuar zakonet tuaja dhe për të ndërmarrë veprime. Që të jeni në humor të mirë, është shumë e rëndësishme të ndërmerrni aktivitete që ju mbajnë të motivuar. Përndryshe, ju mund të jeni duke humbur shumë energji dhe kohë pa ndonjë rezultat produktiv.Ai poashtu ju sfidon t’i shihni gjërat ndryshe. Gjërat që do të duken si pengesë në punën tuaj mund të bëhen forca juaj kur ndryshoni perceptimin tuaj drejt tyre. Për më tepër, vetë-motivimi mund t'ju ndihmojë të qëndroni pozitiv përballë situatave të ndryshme dhe të bëni më të mirën. Njerëzit e vetë-motivuar kanë fuqinë të prekin jetën e punëtorëve të tjerë në një mënyrë pozitive. Energjia juaj mund të ketë një efekt pozitiv te njerëzit me të cilët ndërveproni në vendin tuaj të punës, kësisoj, krijohet një ambient pune më i  shëndoshë.Akademi Pune dëshiron t’i ndajë me ju disa këshilla që ju ndihmojnë të jeni i motivuar në vendin e punës. 1. Mos i anashkaloni aktivitetet fizike Ushtrimi e trupit ndikon në rritjen e serotoninës (që ndihmon trurin tuaj të rregullojë gjendjen shpirtërore, gjumin dhe oreksin). Ushtrimet ju zgjojnë nga gjendja juaj e dembelizmit dhe ju bëjn të ndiheni vigjilent dhe energjikë. Ju nuk do të ndiheni të përgjumur nëse nuk leni anash ushtrimet fizike. Prandaj preferohet që ta caktoni një orar që i përgjigjet agjendës tuaj, para ose pas punës enkas për aktivitete fizike. 2. Gjithmonë kërkoni më shumë nga vetja Mendoni për të gjitha shpërblimet dhe përfitimet që do të merrni nëse mund të përfundoni një punë. Një promovim, një bonus, apo edhe një rritje e pagës tuaj. Të gjitha këto do t'ju ndihmojnë të qëndroni të motivuar dhe të jeni në rrugën e duhur për të arritur qëllimet tuaja nëse përkushtimi juaj për punë nuk mungon. 3. Rishikoni qëllimet e caktuara dhe rëndësinë që kanë Dëshira për arritjen e qëllimeve që ia caktoni vetes ju motivon edhe më shumë. Nëse jeni duke ndërmarrë hapat për të realizuar qëllimet, duhet të filloni me specifikën. Kur i merrni me seriozitet dhe punoni për qëllimet tuaja, ka shumë gjasa t'i arrini ato. Për t’i realizuar këto bëni vetes këto pyetje: Kush është i përfshirë në këtë qëllim? Cilat janë synimet e mia? Cila është arsyeja, qëllimi dhe përfitimet nga caktimi i këtij qëllimi? Cili është afati kohor në të cilin dua ta arrij këtë synim? 4. Mbani qëndrim pozitiv Kjo është ndër pikat më të rëndësishme. Mbani pozitivitet rreth punës suaj. Mos harroni se ju jeni në kontroll të karrierës suaj dhe vetëm ju mund të bëni ndryshimet për t'ju shpërblyer dhe stimuluar, si profesionalisht ashtu edhe personalisht. 5. Krijoni një ambient të rehatshëm pune Mjedisi dhe rrethina bëjnë një ndikim shumë të madh në përpjekjet tuaja për të qëndruar të motivuar. Ndëgjo muzikë qetësuese gjatë kohës së pauzës ose vendos një poster që të motivon para tavolinës suaj të punës. 6. Mbani veten të organizuar Ndonjëherë nuk ndjeheni aq të motivuar nëse ka shumë detyra në dispozicion për të përfunduar dhe nuk dini nga t'ja filloni. Bëni një listë për të bërë dhe caktoni detyrat tuaja sipas listës. Pasi t’i shënoni të gjitha detyrat tuaja, do të jetë më e lehtë për ju që të përqendroheni më mirë dhe të arrini më shumë 7. Rrethoni veten me njerëz pozitiv Nëse ndiheni të pamotivuar në punë, ekziston mundësia që jeni të jeni ankuar për këtë gjë ose keni biseduar rreth gjendjes suaj me ndonjë koleg. Shoqërohuni me bashkëpunëtorë pozitiv që ju përkrahin dhe motivojnë ta jepni maksimumin nga vetja juaj. Qëndrimi me njerëz të tillë dhe shkëmbimi i ideve me ta ju ndihmon që t’i arrini më shpejt objektivat që keni dhe të punoni së bashku në projekte të reja me dëshirë edhe më të shtuar për punë./AkademiPune

Për shumë pronarë të bizneseve, ideja e punësimit krijon imazhe të një jete më të lehtë. Do të keni më shumë kohë dhe më pak stres. Punët nuk do të ngecin dhe më në fund do të jeni në gjendje të rritni biznesin tuaj. Shumë pronarë të bizneseve kanë përvoja të ndryshme kur sjellin stafin dhe mund të mos përfundojnë të kënaqur. Në fakt, një nga ankesat më të mëdha që kanë pronarët e bizneseve të vogla, janë vështirësitë për punësimin dhe marrëdhëniet me punonjësit. Punëdhënësit mund ta gjejnë arsyen duke shqyrtuar dy gjëra të rëndësishme, të cilat janë përgatitja dhe koha. Nëse i shqyrtoni këto dy pika si duhet, atëherë do të rriten edhe gjasat për të punësuar njerëz të duhur që do të jenë pranë jush në arritjen e objektivave që keni. Pra, para se të vendosni të punësoni njerëz të rinj, lexoni këta hapa për t'u siguruar nëse jeni të gatshëm. Analizoni mirë situatën në të cilën ndodheni Është me të vërtetë e rëndësishme që ta  pyesni veten pse doni të punësoni dike? Jo çdo biznes me patjetër duhet të ketë një ekip të madh. Ju mund të keni presion për të rritur biznesin tuaj nga miqtë, familja, ose shoqëria në përgjithësi, por ju personalisht i njihni nevojat që përputhen me qëllimet e biznesit tuaj. Para se të vendosni për rritjen e stafit, rishikoni nëse keni nevojë për përmirësime dhe nëse rritja e stafit do t'ju ndihmonte në arritjen më të shpejtë të qëllimeve që keni. Cili do të jetë ndikimi nga punësimet e reja? Sjellja e anëtarëve të rinj në ekip është mjaft e rëndësishme, mirëpo fillimisht ju duhet të merrni parasysh peshën dhe ndikimin afatgjatë të këtij vendimi. Punësimi dhe trajnimi i dikujt për të qenë pjesë prodhuese e biznesit tuaj kërkon shumë kohë, energji, durim si dhe mjete të mjaftueshme financuese. Prandaj, ju si punëdhënës duhet t’i parashihni të gjitha këto situata me të cilat do të ballafaqoheni. Më e rëndësishmja, të punësosh dikë do të thotë se ata po shfaqin dëshirë dhe gatishmëri të jenë pjesë e ekipit tuaj. Ata do të kërkojnë stabilitet, burime për të përfunduar punën dhe mundësi për ngritje në karrierë. Nëse tashmë kanë pranuar të punonjë bashkë me ju do të thotë që ata me siguri po heqin dorë nga oferta tjera për punë që mund të kenë. Prandaj është përgjegjësi nëse jeni pronar i ndonjë biznesi kur punësoni dikë, pasi duhet përkushtim për t’i ndihmuar ata të zhvillohen. Pastaj, ky përkushtim i juaji padyshim se do t’ju kthehet me punë dhe mirëbesim nga ana e tyre. Vlerësoni nevojat tuaja Kur bëhet fjalë për të sjellë një person të ri, së pari do të duhet të keni një ide shumë të mirë se çfarë detyrash dëshironi të kryej ai person. Për ta bërë këtë, së pari duhet të keni një ide rreth kërkesave aktuale të tregut, se ku keni nevojë për përmirësime dhe si punonjësi i ri do t'ju ndihmoj në përmbushjen e këtyre kërkesave. A jeni të gatshëm financiarisht? Ka shumë rëndësi të siguroheni nëse jeni financiarisht të gatshëm për të sjellë punonjës të ri. Ju nuk duhet të bazoheni vetëm në pagën që ia jepni punonjësit dhe ta shihni këtë si shpenzim të vetëm, pasi përveç pagës, punonjësit do të kenë nevojë edhe për trajnime të ndryshme në mënyrë që produktiviteti i tyre të rritet në punë. Ju gjithashtu duhet të shikoni përtej asaj që tregojnë tani financat tuaja dhe të siguroheni që do të ketë punë të qëndrueshme edhe në të ardhmen. Punësimi  i më shumë personave do t'ju lejojë të zgjeroni kapacitetet, por duhet të ekzistojë një plan se cila është mënyra e duhur që kjo të funksionojë./AkademiPune

Si ta dini kur është koha për të lënë punën tuaj, të lini një ekip, një kompani, dhe të bëni një ndryshim në karrierë? Po pyesni veten nëse është koha për të ndryshuar shtigjet e karrierës? Është koha për një ndërrim të karrierës nëse vazhdimisht keni në mendje një gjë të tillë por ende hezitoni ta merrni vendimin final. Akademi Pune ju sjell 6 shenja që ju tregojnë është koha për një ndryshim në karrierë. 1.Nuk po mësoni gjëra të reja Nëse nuk po sfidoheni me gjëra të reja dhe puna juaj ka kaluar në monotoni, mund të jetë koha për të bërë një ndryshim. Ju nuk po mësoni më nga detyrat, projektet apo gabimet tuaja. Puna juaj nuk është duke ju ofruar njohuri ose aftësi të reja. Kur nuk sfidoheni më në punën tuaj, ju nuk e jepni më të mirën nga vetja. Ju nuk po e shtyni më veten të bëni dhe të provoni gjëra të reja jashtë zonës suaj të rehatisë. 2. Nuk po vlerësoheni ose shpërbleheni Një nga arsyet që njerëzit kanë sukses dhe e shtyjnë veten për arritje edhe më të mëdha është për shkak të kënaqësisë që ata marrin pasi të kenë arritur diçka. Kjo gjithashtu ka të bëjë me vlerësimin që merrni duke parë punën e vështirë dhe të shpërbleheni për të. Prandaj edhe ekzistojnë promovimet, ngritjet e pagave, shpërblime dhe çmime të ndryshme për të shpërblyer dhe motivuar punonjësit që tregojnë rezultate. Nëse një punonjës nuk pranon asnjërën nga këto, atëherë edhe dëshira për punë zvogëlohet. 3. Nuk shihni mundësi për zhvillim Ju mund të doni një punë, ekipin dhe mjedisin. Ju madje mund ta doni atë që bëni, por kur ka zero mundësi për t’u zhvilluar, ju vetëm se po e dëmtoni karrierën tuaj. Nëse qëndroni në një punë ku nuk ju mundëson zhvillim të aftësive dhe njohurive të reja, kësisoj ju po ndaloni së zhvilluari dhe nuk do të jeni në gjendje t’i shihni mundësitë e mahnitshme që mund të ketë e ardhmja për ju. Nëse e shihni veten të gatshëm për zhvillim por nuk mund ta bëni këtë nga pozita juaj aktuale, është koha të bëni një vlerësim dhe të kaloni në diçka që do t'ju lejojë të rriteni në kohën e duhur. 4. Puna aktuale po ndikon negativisht në vetëbesimin tuaj Nëse filloni të dyshoni për veten dhe punën që bëni, atëherë duhet të ndryshojë diçka në mjedisin tuaj të punës. Nuk ja vlenë ta vazhdoni qëndrimin në një punë ose karrierë që nuk ju bën të ndjeheni mirë për veten tuaj, pavarësisht se cilat janë përfitimet financiare. Një karrierë përmbushëse duhet të jetë një nxitje për besimin dhe vetëvlerësimin tuaj, jo e kundërta e kësaj. 5. Ju ka humbur dëshira për punë Kur ju mungon dëshira për punë, ju filloni të mos jepni maksimumin tuaj dhe kjo ndikon që të mos i përfundoni punët tuaja si duhet. Kjo ndikon jo vetëm në rezultatet e punës suaj, por edhe në energjinë tuaj në zyrë, si dhe në mënyrën e bashkëveprimit me të tjerët. Nëse ndiheni të lodhur dhe jo të motivuar rreth punës/karrierës tuaj aktuale, duhet ta dini se kjo punë nuk është duke ju ndihmuar, mirëpo as ju nuk jeni duke ndihmuar ekipin dhe kompaninë. 6. Dëshironi më shumë Arsyeja më e rëndësishme pse është koha për një ndryshim është kur dëshironi më shumë. Kjo pikë bashkon të gjitha arsyet e mëparshme. Dëshira për më shumë vjen nga dëshira për të mësuar më shumë, të rriteni, të sfidoheni, të vlerësoheni dhe të jeni të kënaqur me atë që bëni. Ndryshimi ndoshta është një gjë e vështirë. Largimi nga zona juaj e rehatisë dhe hapësira juaj e sigurtë është edhe më e vështirë, por është e domosdoshme nëse doni të ngriteni dhe arrini qëllimet që ia keni caktuar vetes. Gjëja që më së paku do të donit është të zgjoheni vite nga tani dhe të kuptoni se mund të kishit korrur suksese më të mëdha, nëse nuk do t'i injoronit shenjat që ju tregonin se është koha për ndryshim./AkademiPune

Nëse jeni punësuar në punën që dëshironit do të thotë se jeni në rrugën e duhur të karrierës suaj dhe të gatshëm për rrugëtimin tuaj të ri dhe sfidat në vijim. Fillimi i një pune të re mund të jetë një kohë e vështirë, por edhe emocionuese në të njëjtën kohë. Pavarësisht nëse kjo është "puna juaj e parë në zyrë" ose puna juaj e pestë, java e parë shihet si më e vështira pasi që ende nuk jeni përshtatur me ambientin e punës, si dhe nuk jeni njoftuar me të gjithë stafin që do të bashkëpunoni. Kur filloni një punë duhet t'i kushtoni rëndësi sjelljeve dhe gjithmonë përpiquni të lini përshtypje sa më të mirë. Kjo do t'ju ndihmojë të fitoni besimin e bashkëpunëtorëve dhe mbikëqyrësve tuaj. Këtu janë pesë gjëra që nuk duhet të bëni kur filloni punën tuaj të re, jo vetëm në javën e parë, por edhe në muajt në vijim. 1.Mos u vononi Siç e dimë ky është një fakt i njohur që duhet të arrijmë gjithmonë në kohë në punë, por kjo vjen më shumë në fuqi kur ju jeni personi i ri në punë. Javët e para, madje edhe muajt janë ende "prova" dhe gjithçka që bëni vlerësohet. Mësoni se në cilin orar do të mund ta shmangni trafikun më të madh dhe cila kohë do t'ju mundësoj të shkoni në zyrë pikërisht në orarin e duhur. Menaxhimi i duhur i kohës ju mundëson të mos jeni vonë për punë si dhe t’i përfundoni me sukses aktivitetet tjera ditore. 2. Mos mungoni pa njoftuar mbikëqyrësin tuaj Nëse një ditë më parë e dini që nuk do të jeni në gjendje të shkoni në punë, është mirë ta thërrisni në telefon mbikëqyrësin tuaj dhe ta njoftoni. Gjëja e fundit që duhet ta bëni është të telefononi ose t'i shkruani mbikëqyrësit tuaj 5 minuta para fillimit të orarit të punës për ta njoftuar që nuk jeni në gjendje të shkoni atë ditë në punë. Kjo vetëm ju bën të dukeni joprofesionist dhe aspak serioz. Nëse nuk keni numrin e drejtpërdrejtë të menaxherit ose të mbikëqyrësit tuaj, mund ta dërgoni një email, apo t'i  shkruani mesazh një kolegu për t'i njoftuar të tjerët. 3. Mos i injoroni udhëzimet Në një vend pune nuk duhet të mos mungoj bashkëpunimi dhe ju t'i ndjekni udhëzimet që ju jepen. Problemi qëndron se, ju si një  punonjës i ri ende jeni në adaptim të praktikave të punës së re, dhe nëse harroni të ndiqni udhëzimet mund të mos jeni në gjendje ta kryeni si duhet punën që u kërkua nga ju. Nëse nuk jeni të sigurt për atë që duhet të bëni ose keni nevojë për udhëzime shtesë, gjithmonë sigurohuni që të bëni pyetje dhe të merrni shënime në mënyrë që t'i keni të qarta detyrat që ju caktohen. 4. Shmangni përdorimin e telefonit Një nga gjërat e para që bëjm në mëngjes është kontrollimi i telefonit. Rrjetet sociale kanë  ndikuar që të krijojmë shprehi ta hapim telefonin kohë pas kohe edhe nëse nuk kemi pranuar ndonjë mesazh nga dikush tjetër. Përdorni sa më pak telefonin gjatë orarit të punës pasi që ndikon negativisht në përqendrimin dhe produktivitetin tuaj. 5. Mos u stresoni Pavarësisht nëse kjo është puna juaj e parë apo jo, mbani gjithmonë mend se kur filloni një punë të re jeni në fazën fillestare. Ju ndoshta mund të keni përvojë paraprake, si dhe t'i përshtateni punës suaj të re ashtu siç planifikonit, mirëpo do të ketë raste edhe kur mund të bëni gabime. Prandaj, mos stresoni kur gjërat nuk dalin perfekte që në provën e parë, ose kur keni vështirësi të kuptoni një trajnim, sistem ose një detyrë./AkademiPune

Ne shpesh mund t’i kthejmë pasionet tona në një biznes, por kërkon shumë punë paraprakisht për ta realizuar idenë që kemi. Marrja e masave të duhura para se ta transferoni idenë tuaj në biznes, do t'ju vendosë në pozicionin më të mirë të mundshëm për ta realizuar atë. Me pak fjalë, të vërtetoni idenë, do të thotë të bëni punën për të siguruar që të keni tregun e duhur, çmimin e duhur dhe modelin e duhur për të ofruar produktin/shërbimin në mënyrë efikase dhe fitimprurëse. Pa një ide dhe plan të qartë ju rrezikoni të përballeni me situata të ndryshme si: Mund të mos shisni asgjë Shpenzimet të dalin më të mëdha se sa parashikonit Pritshmëritë të mos përputhen me rezultatet Pa përgatitje dhe strategji të menduar mirë, do ta keni vështirë ta filloni biznesin tuaj. Idetë më të mëdha mund të dështojnë shumë lehtë pa qasjen e duhur, dhe dështimi mund të bëjë që të hiqni dorë nga një ide që mund të jetë e mahnitshme me vetëm disa ndryshime. Ju duhet të merrni parasysh rrethanat në të cilat ndodheni, kur vendosni nëse ideja juaj do të arrijë të bëhet një biznes i zbatueshëm. Hulumtimi i industrisë, cilat janë trendet e fundit? A keni pasur ndonjë ide të mahnitshme dhe pas disa kërkimeve në Google keni vërejtur se ajo ide tashmë është realizuar nga dikush tjetër? Është vërtet dëshpëruese në fillim, por kur e shikoni nga një këndvështrim tjetër, kjo nënkupton që ideja që kishit do të funksiononte. Mirëpo , ju nuk duhet të hezitoni të përballeni me konkurrencën. Vetëm sepse dikush tashmë po bën atë që dëshironi të bëni, kjo nuk do të thotë se nuk do të funksionojë. Kjo thjesht do të thotë që ju duhet të gjeni mënyrën tuaj unike për ta bër atë. Përdorni hulumtimin rreth konkurrencës dhe industrisë për të kuptuar propozimin tuaj unik të shitjes. Çka ju dallon nga të tjerët? Cilat janë nevojat e paplotësuara në treg? Opsionet e çmimeve që ju ofroni? Cila është mënyra më e mirë për të nxjerrë produktin ose shërbimin tim në treg? Si dhe ku do ta shpërndani produktin ose shërbimin tuaj është një vendim i rëndësishëm për të marrë. A do të shisni online? Vetëm në nivel lokal apo edhe më gjerë? A do të shisni me shumicë apo do të keni bashkëpunëtorë/partnerë? Ju mund të keni një ide të shkëlqyeshme për një produkt ose shërbim, por nëse nuk e gjeni mënyrën më fitimprurëse dhe më të përshtatshme do ta keni vështirë të krijoni urë lidhëse ndërmjet produktit/shërbimit dhe klientit. Kërkoni këshilla nga ekspertë Nisja dhe rritja e një biznesi është e vështirë, dhe sipas statistikave më shumë se gjysma kanë gjasa të dështojnë brenda 5 viteve. Askush nuk mund të ketë të gjitha njohuritë, përvojën, apo edhe perspektivën për të trajtuar çdo situatë biznesi. Prandaj kontaktoni njerëz me përvojë në fushën e biznesit dhe përfitoni nga aftësitë dhe përvojat e tyre./AkademiPune

Përderisa gjithnjë e më shumë kompani drejtohen në Internet për të gjeneruar shitje, nevoja për ekspertë në marketing dixhital nuk ka qenë kurrë më e madhe. është një industri me hapa të shpejtë, që ka shumë sfida, por edhe shumë shpërblime, duke përfshirë një të ardhur potencialisht fitimprurëse. Nëse keni menduar për hyrjen në dixhital marketing , tani është koha ta bëni atë. Nuk është e nevojshme që patjetër të keni diplomë të marketingut për të filluar një karrierë në këtë fushë, nëse keni përkushtimin e duhur ndjekja e trajnimeve të ndryshme në dixhital marketing do t'ju ndihmojnë të merrni hapat e nevojshëm. Akademi Pune ju sjell disa këshilla se si ta filloni një karrierë në dixhital marketing: Krijoni një prezencë online Në kohën që po jetojmë, punësimi është mjaft i vështirë nëse nuk jeni prezent në rrjetet sociale për t’i ndjekur trendet e fundit dhe zhvillimin e tregut të punës. Rekruterët dhe kompanitë e shumta i drejtohen rrjeteve sociale për të mësuar në lidhje me aplikantët. Nëse ju nuk keni llogari tuajën personale në platformat si Facebook apo LinkedIn ata shumë shpejt kalojnë te kandidati tjetër, prandaj kushtoni rëndësi prezencës tuaj online, e sidomos llogarisë tuaj të LinkedIn që ta përditësoni atë vazhdimisht. Përcjellni trendet e fundit Marketingu dixhital është një karrierë që gjithmonë është në lëvizje dhe gjithnjë në ndryshim. Nëse e zgjedhni si karrierë, duhet të jeni në hap me trendet e fundit vazhdimisht. Nevojat e kësaj industrie ndryshojnë me kalimin e kohës, dhe nëse ngecni në hapa, rrezikoni të zëvendësoheni nga dikush tjetër që është duke pritur ta zë vendin tuaj. Këtë mund ta bëni duke ndjekur seminare dhe trajnime të ndryshme të kësaj fushe që të jeni vazhdimitsht në rrjedha me zhvillimet e fundit. Përdorni kreativitetin tuaj Marketingu dixhital me të vërtetë ju lejon të përdorni kreativitetin tuaj në mënyra të ndryshme. Ka metoda dhe sisteme që janë të standardizuara për aplikime të caktuara, por gjithmonë mund të shtoni aftësi personale në projekte, duke i bërë ato kreative dhe unike. Kjo industri është e bazuar në kreativitet, kështu që nëse keni një ide që mendoni se do të funksionojë, mos hezitoni ta provoni. Zgjeroni rrjetin tuaj të njerëzve Njohja e sa më shumë njerëzve, shkëmbimi i ideve dhe përvojave me ta ka rëndësi të madhe në formësimin tuaj. Një person mund të dijë se ku mund të merrni trajnime specifike, dikush tjetër madje mund t’ju bëj një ofertë pune që nuk mund ta refuzoni. Prandaj, mos ngurroni të krijoni miq të rinj, pasi përmes lidhjeve të reja ju keni mundësi të shprehni idetë tuaja dhe të krijoni ura lidhëse për bashkëpunim në të ardhmen. Merrni përvojë Forma më e mirë se si mund të fitoni përvojë është përmes punës praktike. Shfaqni interesimin tuaj duke aplikuar për punë praktike në ndonjë kompani, pasi ky është një investim i vlefshëm në kohë me përfitime afatgjata. Aftësitë dhe përvojën që e fitoni do t’ju hapin rrugë dhe mundësi të shumta gjatë gjithë karrierës./AkademiPune