Artikujt e Fundit
5 këshilla për të gjetur karrierën e duhur
Gjetja e punës së duhur nuk është një proces i thjeshtë. Kërkon shumë hulumtim, përkushtim dhe përgatitje. Ky proces shkon e bëhet më i vështirë në rastet kur nuk e dini se çfarë pune dëshironi të bëni. Ka shumë njerëz që për vite të tëra e kanë bërë një punë që nuk e kanë dashur, kjo ngase nuk kanë arritur të gjejnë karrierën e duhur për vete. Shumica e tyre e kanë ndërruar karrierën e tyre të paktën një herë dhe shumë prej tyre mund ta mendojnë një ndryshim të tillë. Këtu gjeni 5 hapa për të gjetur karrierën e duhur. 1. Bëni teste rreth karrierës Ndonëse testet rreth personalitetit dhe karrierës mund të duken sikur të pasakta dhe të pakuptimta, janë një formë e mirë e vlerësimit. Duke bërë teste të tilla, sadopak mund ta kuptoni se cilën rrugë duhet të merrni. Keni parasysh se testi duhet të jetë i besueshëm dhe të japë rezultate përafërsisht të njëjta disa herë rresht. 2. Identifikoni pikat e juaja të forta E dyta që mund të bëni është t'i identifikoni pikat juaja të forta dhe t’i shkruani në një letër. Efektive është nëse analizoni dhe shkruani se çka po arrini të bëni kur jeni të lumtur, në të njejtën kohë edhe kur ndjeheni të stresuar dhe në ankth. Kjo mund t’ju ndihmojë të identifikoni karrierën potenciale dhe karrierën të cilës duhet t’i qëndroni larg. 3. Bëni një listë me opsione Edhe nëse e dini saktësisht se çka dëshironi të bëni, prapë se prapë arritja deri aty mund të jetë stresuese. Për të mos gabuar në karrierën e ëndrrave, një tjetër hap që mund ta merrni është të shkruani disa opsione. Pasi të keni shkruar gjithçka, renditni opsionet nga ato që ju përshtaten më shumë deri të ato më pak si dhe kombinoni ato profesione që kanë ngjashmëri. Analizoni se çka nuk duhet të jetë aty dhe gjeni qëllimin tuaj. Mundohuni të shkruani sa më shumë opsione në mënyrë që të keni hapësirë për të krahasuar dhe bërë zgjedhjen e duhur. 4. Krijoni rreth Pavarësisht nëse jeni duke kërkuar një karrierë të re apo nuk jeni të kënaqur me atë që bëni dhe dëshironi të merrni një hap më ndryshe, rrjetëzimi është një formë shumë e mirë për ta realizuar këtë. Sa më shumë njerëz të takoni, aq më shumë do ta kuptoni se si duket ambienti i punës ku dëshironi të jeni, i kuptoni më shumë karakteret e njerëzve dhe llojet e punëve. Sondazhet tregojnë se rreth 85% e punëve plotësohen përmes rrjetëzimit. 5. Pyesni një mentor Rreth 80% e CEO-ve ia dedikojnë suksesin e tyre punës me mentorë. Një mentor i mirë ka një vlerë shumë të madhe. Prandaj, për ta bërë zgjedhjen e duhur është mirë të mësoni dhe punoni me mentorë. Mentori i duhur, pa marrë parasysh fushën, do t'ju japë udhëzime për t’u rritur në karrierë. 
Lexo më shumë
Këshilla rreth karrierës për punonjës ambicioz
Nuk ka ndjenjë më të mirë sesa ta dini se keni njerëz të cilët ju mbështesin, ju shtyjnë që ta jepni më të mirën nga vetja dhe festojnë sukseset tuaja së bashku me ju. Këta lloj njerëzish janë zakonisht anëtarë të familjes dhe miq të ngushtë. Është një ndjenjë e mahnitshme ta keni fatin t'i takoni këta njerëz gjersa jeni në udhëtimin tuaj në karrierë. Asnjëherë nuk duhet të ndjeheni sikur i detyroheni punës suaj aktuale çdo lloj angazhimi nëse nuk po merrni atë që dëshironi ose meritoni. Nëse nuk jeni më duke u sfiduar ose të paktën nuk sfidoheni sa duhet dhe e dini se meritoni më shumë, atëherë është koha për ndryshime. Gjithmonë mendoni se çfarë funksionon më mirë për ju Bëni gjëra që do t'ju sjellin dobi, jo vetëm në kohën e duhur, por edhe në të ardhmen e afërt. Kurdo që merrni një vendim jo vetëm për karrierën tuaj, por edhe jetën tuaj personale, mos harroni të vendosni veten në radhë të parë. Shqyrtoni të gjitha opsionet tuaja dhe përzgjedhni ato që funksionojnë për ju. Gjithmonë kërkoni më shumë Për të qenë në gjendje të qëndroni në një ekip, ju duhet të bëni më shumë sesa vetëm detyrat që kërkohen nga ju. Ju duhet të jeni në gjendje të ngrini dorën tuaj dhe të kërkoni më shumë që të jeni në gjendje të qëndroni në këmbë dhe të tregoni se çfarë jeni në gjendje të bëni. Mos hezitoni të kërkoni detyra shtesë pasi t’i keni mbaruar detyrat e caktuara nga menaxheri/punëdhënësi juaj. Mos keni frikë të aplikoni për një pozitë më të lartë Mos hezitoni të dilni jashtë zonës tuaj të rehatisë. Kjo vlen më shumë kur ne aplikojmë për një vend pune, por zakonisht kërkojmë atë që jemi pothuajse të sigurt që do të merrnim. Cila është më e keqja që mund të ndodhë kur aplikoni për atë pozitë? Edhe nëse nuk arrini atë që kërkoni, ju do të mësoni se çka kërkohet nga ju, si dhe fushat ku keni nevojë për përmirësime. Kësisoj, në tentimet tuaja të mëvonshme do të jeni më të përgatitur për ngritje në pozitë. Kuptoni se cilat janë pikat tuaja të dobëta dhe të forta dhe mësoni prej tyre Përdorni pikat tuaja të forta në avantazhin tuaj dhe punoni në përmirësimin e dobësive tuaja. Të gjithë kemi pikat e forta dhe të dobëta. Njerëzit janë shpesh janë të prirur t’i shmangin detyrat që kërkojnë aftësi për të cilat mendojnë se janë dobësi. Kjo shmangie mund të shkaktojë probleme dhe nuk ju lejon t’i luftoni dobësitë që keni. Cila është zgjidhja? Një mundësi e mirë për tu ballafaquar me një dobësi është të gjeni një mënyrë të re për t'iu qasur asaj. Le të themi se dobësia juaj është rrjetëzimi, sidoqoftë, dy nga pikat tuaja të forta janë mirëbesimi dhe empatia. Ju mund të kërkoni një mënyrë për t'iu qasur të tjerëve duke përdorur këto dy tipare që keni. Nëse një bashkëpunëtor ju ka ndihmuar ose një kontraktues ka bërë një punë të mirë, zgjidhja juaj mund të jetë diçka si përcjellja metodike me një email, falënderim ose mesazh me tekst. Duke vepruar në këtë mënyrë, ju veçse i hapni rrugë vetes për krijimin e miqësive të reja që mund të jenë thelbësore në ndërtimin e karrierës.
Lexo më shumë
5 këshilla efektive për ngritje në karrierë
Ngritja në një pozitë pune shoqërohet me një rol më të mirë në kompani, me një pagë më të mirë por edhe me më shumë përgjegjësi. E gjithë kjo, me një fjalë nënkupton vlerësim nga kompania. Sidoqoftë, për t’u ngritur në karrierë duhet të keni një performancë të shkëlqyeshme në punë si dhe të merrni vëmendjen e personave që udhëheqin kompaninë. Ani pse kriteret sa i përket kësaj çështjeje dallojnë nga kompania në kompani, ju mund të tregoni veten si kandidatin ideal duke ndërmarrë disa hapa, për t’u bërë kështu një nder personat kryesor për t’u ngritur në pozitë. 1. Tregoni se kompania ka vlerë për ju Me fjalë të tjera, bëni më shumë se sa që ju kërkohet ndonjëherë. Nëse e doni një pozitë pune pune të caktuar, ju duhet të tregoni rëndësinë që ka kompania për ju. Secili punëdhënës dëshiron punëtorë për të cilët kompania ka vlerë të veçantë. Prandaj, filloni me këto hapa: Përmirësoni aftësitë e juaja Sillni rezultate në kompani Përfshihuni në aktivitete të ndryshme Zgjeroni njohuritë e juaja Ndiqni hapat e personave që janë ngritur në pozitë Një tjetër këshillë është të  shikoni nga afër personat që janë ngritur në pozitë viteve të fundit. Mundohuni t’i kuptoni se cilat janë vetitë dhe arritjet që i kanë bërë të kenë sukses në ngritjen në pozitë. Kërkoni tipare të përbashkëta të personalitetit si dhe zakonet midis atyre që janë promovuar me sukses. Krejt kjo mund t'ju japë një imazh më të mirë të asaj që duhet të bëni për ta arritur ngritjen. Për shembull, disa punëdhënës kanë tendencë të ngrisin në pozitë punonjës që janë lojtar të ekipit. Në një situatë të tillë, duhet të tregoni gatishmëri për të ndihmuar me projektet e ekipit. Kërkoni feedback nga mentori juaj Se si mund ta arrini ngritjen në karrierë, mund ta kuptoni edhe nga punëdhënësi apo menaxheri juaj. Kërkoni një takim me ta dhe ndiqni këta hapa që ta merrni një reagim pozitiv mbi performancen tuaj. Bëni një listë me përgjegjësitë që dëshironi të merrni, arritjet e juaja dhe aftësitë që keni fituar  Nënvizoni se si kompania ka përfituar nga ju Paraqisni kërkesën tuaj për ngritje në mënyrë sa më profesionale që është e mundur Identifikoni dhe zgjidhni problemet Në secilin vend pune mund të shfaqen probleme. Personat që i identifikojnë dhe zgjidhin problemet kanë gjasat të ngriten në karrierë. Shihni se çka po e ndikon negativisht kompaninë dhe kontribuoni në përmirësimin e atyre gjërave. Mbani një etikë të mirë të punës Performanca në punë është një faktor shumë i rëndësishëm për ngritjen në karrierë. Për këtë arsye, duhet të dëshmoni se keni etikë të fortë të punës dhe që jeni prej atyre njerëzve që vazhdimisht merrn iniciativën për ta përmirësuar gjendjen në kompani.
Lexo më shumë
7 shenja që tregojnë se do të jeni lider i suksesshëm
Liderët kanë tipare të ndryshme si organizimi, përkrahja e ekipit, delegimi i detyrave, përkushtimi si dhe qëndrimi pozitiv. Të gjitha këto e forcojnë karakterin e një lideri të sukseshëm. Përveç këtyre ka edhe shenja tjera që tregojnë se mund të jeni të përshtatshëm për udhëheqje, ndër to janë: 1. Ju me të vërtetë dëshironi që biznesi të ketë sukses Për ju, mundësia për të udhëhequr nuk ka të bëj vetëm ta keni një pagë më të madhe. Ju vërtet interesoheni për vizionin e kompanisë dhe dëshironi të kontribuoni në suksesin e saj. Ju madje mund të keni ide se si të drejtoni rrjedhën e punës ose të bëni përmirësime në proceset ekzistuese. 2. Ju përshtateni mirë në situata të reja Përshtatshmëria është një nga aftësitë më të rëndësishme që mund të posedoj një person, e sidomos nëse ai person është ose pretendon të jetë një lider në të ardhmen. Liderët duhet të jenë në gjendje të ecin me kohën dhe të provojnë gjëra të reja për të përmirësuar biznesin. Ata duhet të dinë se si të reagojnë ndaj të papriturave me qetësi dhe profesionalizëm, si p.sh kur ka një ndryshim të madh në vëllimin e punës, ose një anëtar i ekipit të tyre jep dorëheqje papritmas. 3. Përkrahja e anëtarëve të ekipit A keni vërejtur ndonjëher një standard të dyfishtë? A keni qenë dëshmitar i një padrejtësie? Udhëheqësit e mirë nuk hezitojnë të reagojnë kur ka padrejtësi dhe janë të vendosur për atë që mendojnë se është e drejtë dhe nuk bazohen në thashetheme. Përkrahja e anëtarëve të stafit është një karakteristikë e rëndësishme e një udhëheqësi. 4. Nuk e keni problem të pranoni kritika konstruktive Edhe pse drejtuesit dhe menaxherët shpesh shoqërohen nga njerëz me "personalitete të forta" të cilët mund të jenë kokëfortë në pikëpamjet e tyre, një udhëheqës i mirë duhet të ketë një perspektivë objektive mbi atë që po ndodh brenda vendit të punës. Kjo mund të jetë një nga pjesët më të vështira të punës sepse ne shpesh mendojmë se jemi objektiv kur nuk jemi nganjëherë të tillë. Një lider i matur pas pranimit të kritikave ndërmerr veprimet e nevojshme për të përmirësuar gjërat në përputhje me rrethanat. 5. I besoni intuitës tuaj Gjatë udhëheqjes së një ekipi në territor të paeksploruar, liderët me përvojë besojnë në vete për të marrë vendime të shëndosha. Ata bazohen në përvojat e kaluara ose kërkojnë ndihmë nga mentorë dhe anëtarë me përvojë të fushës së tyre. Frika nga e panjohura nuk i mban ata larg sepse besojnë në veten e tyre dhe ekipin e tyre. Kësisoj, nëse ju keni një tipar të tillë do t’i arrini më lehtë qëllimet që keni dhe të korrni sukses në fushën e udhëheqjes. 6. Jeni të përgjegjshëm Të gjithë bëjnë gabime, poashtu edhe udhëheqësit ka raste kur gabojnë. Dështimet më shumë se sukseset e ndajnë të mirën nga e keqja, duke pasur parasysh që kjo e fundit kërkon që dikush të fajësohet në vend që të marrë përgjegjësi. Drejtuesit e mëdhenj japin përgjegjësi për ekipin e tyre në rast të dështimit të ndonjë projekti. Ata nuk zhgënjehen nga periudhat e dështimeve pasi që nuk rreshtin së besuari dhe përkrahuri ekipin e tyre për ta tejkaluar periudhat kritike. 7. Ju inspironi të tjerët Udhëheqësit e mirë e dinë ndryshimin midis urdhërave dhe udhëheqjes. Udhëheqja përfshin frymëzimin e njerëzve për të dhënë më të mirën nga vetja për të arritur e rezultateve që ata synojnë. Udhëheqësit e mirë frymëzojnë anëtarët e ekipit të tyre që të bëhen versioni më i mirë i vetvetes që mund të jenë.
Lexo më shumë
6 gjëra jo profesionale që mund të jeni duke i bërë në punë
Shumë njerëz kur punojnë për një kohë të gjatë në një vend pune, fillojnë dhe e ndjejnë një lloj rehatie dhe detyrat e punës ndonjëherë i marrin me më pak seriozitet. Pavarësisht kohës sa keni qenë në një kompani apo vend pune është shumë e rëndësishme që ta ruani profesionalizmin. Ju mund të mos e vëreni se jeni duke bërë diçka jo profesionale dhe punëdhënësit apo kolegët të mos ua thonë. Sidoqoftë, këtu janë disa sjellje të cilat mund t’ju bëjnë të dukeni jo profesional në punë. Vini në punë me vonesë Për shumë njerëz, arritja me vonesë në punë apo edhe në takime mund të mos jetë një problem i madh, mirëpo është diçka që vërehet. Vonesat njëherë në shumë ditë, janë deri dikund të justifikueshme. Mirëpo, tentoni të mos shndërroheni në personin që të gjithë e njohin sikur ai që vonohet. Mundohuni ta menaxhoni më mirë kohën, të largoheni nga shtëpia disa minuta më herët për të arritur në kohë për takimet e mëngjesit. Ankoheni shpesh Ngarkesa në punë mund t'ju bëjë të mendoni se si shumë gjëra mund të mos jenë duke shkuar shumë mirë në vendin e punës. Një gjë e tillë është më së normale dhe shumicës mund t’ju ketë ndodhur. Sidoqoftë, mos lejoni që ngarkesa e punës t’ju çojë në ankesa tek kolegët. Në të tilla raste, profesionale është të njoftoni menaxherin apo punëdhënësin tuaj rreth shqetësimeve që keni. I ndërprisni të tjerët Të gjithë duan të ndjehen të përfshirë, të jenë pjesë e ekipit dhe të japin mendimin e tyre. Mirëpo, askujt nuk i pëlqen të ndërpritet gjatë kohës sa është duke folur. Profesionale në këtë rast është ta lini kolegun/en ta përfundojë fjalinë e pastaj të jepni mendimin tuaj. Injoroni gjërat “e vogla” 30 minutat e para të mëngjesit rekomandohet të ndahen për gjëra të cilat mund të mendoni që janë të vogla, si p.sh ta organizoni desktopin, e-mailin, t’i ktheni emails të cilat presin përgjigje e shumë të tjera. Këto mund të mos jenë prioritete për shumë njerëz mirëpo janë shumë të rëndësishme në një vend pune. Bëni thashetheme Thashetheme ka pothuajse në çdo vend pune dhe ndonjëherë mund të jetë e vështirë të evitohen. Negativiteti në punë nuk ju çon asgjëkundi. Kështu që, largohuni kur e shihni se biseda po kalon në negativitet dhe po flitet për persona të tjerë që nuk janë prezent. Premtoni shumë dhe realizoni pak Një ndër gjërat e tjera që konsiderohet jo profesionale në punë është angazhimi për një punë dhe mos përfundimi i saj në kohë. Një gjë e tillë tregon besueshmëri të dobët dhe nëse vazhdoni ta bëni atë, njerëzit do të fillojnë të dyshojnë në aftësitë tuaja.
Lexo më shumë
Agnesa Sekiraqa me “ThesQefi” sjell produkte unike dhe të kërkuara në Kosovë
Asnjë biznes nuk fillon njësoj. Disa nisin nga një dhomë e vogël, disa në garazha, e disa të tjerë në zyrë. Sidoqoftë, nuk ka rëndësi se ku nisë një biznes, e rëndësishme është se si ndërmerren hapat drejt suksesit. Janë të shumtë të rinjtë e talentuar nga Kosova, të cilët po krijojnë biznese në industri të ndryshme. Shumë prej tyre kanë krijuar stabilitet financiar dhe po punojnë edhe drejt shtrirjes së tregut jo vetëm në Kosovë, por edhe ndërkombëtarisht. E puna artizanale është një ndër biznesetqë po nisin të rinjtë e kohës moderne. Puna artizanale kërkon gërshëtim të pasionit, talentit dhe kreativitetit. Pikërisht këto tri elemente janë ato që e bëjnë të suksesshëm një biznes artizanal. I udhëhequr nga Agnesa Sekiraqa, një artiste re përplot ide e ambicie, “ThesQefi” është njëri ndër këto biznese. Kreativiteti dhe cilësia në produktet që ofron, e bëjnë këtë biznes dhe këto produkte unike dhe shumë të kërkuara nëtregun Kosovar. Në një intervistë për Akademi Pune, Agnesa Sekiraqa tregoi më shumë se si lindi ideja dhe si erdhi deri te krijimi i “ThesQesi”. Profesioni që fillimisht kishte zgjedhur ishte dizajni i modës, një profesion i cili ndonëse kompleks, kërkonte shumë pasion dhe i krijonte mundësinë ta shprehte sa më shumë kreativitetin e saj.  “Thesi” si koncept ka nisur rastësisht, krejtësisht në mënyrë spontane. Derisa isha duke shikuar feed-in në instagram, pashë një model të një ulëseje me ajër. Në shikim të parë mu duk interesant. Hulumtova tregun, ndërkohë në shtëpi po punoja me proceduren e modelimit, prerjes, qepjes. Pa qenë e sigurtë që ajo që doja të ofroj do të përputhej me kërkesen e tregut për një ulëse të tillë, finalizova thesin e parë e që nuk ishte më i miri i mundshëm.Isha kërkuese sepse edija që thesi që doja ta krijoja do të duhej t’i përmbushte të gjitha pritjet e një klienti potencial” Gjërat të cilat e përbëjnë një veshje siç janë përmbajtja e materialeve, patroni e qepja, janë disa prej gjërave bazike të cilat Agnesa i mësoi gjatë fillimit të studimeve. Këto njohuri ndonëse bazike, i shërbyen shumë në punën të cilën e bën edhe sot me biznesin e saj. “Qepja, ishte një ndër proceset që më sfidoi për të bërë gjëra të tjera të cilat nuk ishin pjesë e lëmisë që tashmëkisha zgjedhur” Thonë se fitues janë ata që nuk dorëzohen. E dedikuar në punën e saj, pas tre tentimesh Agnesa Sekiraqa tregon se arriti të krijojë thesin e katërt i cili sot është një ndër ulëset më të rehatshme në treg dhe në të njejten kohë është ndër produktet më të kërkuara nga “ThesQefi”. Cila është forma më e mirë për të promovuar punën artizanale? Ndonëse teknologjia ka lehtësuar shumë gjëra në të bërit biznes, krijimi i emrit në treg mund të jetë një proces i vështirë. Kësisoj, e rëndësishme është të gjindet forma që funksionon më së miri. Agnesa Sekiraqa me ekipin e saj, promovimin dhe shitjen e produkteve të ThesQesi e bëjnë online, nëpërmjet rrjeteve sociale. “Duke marrë parasysh se 81% e konsumatorëve bëjnë kërkime në internet para se të vendosin të blejnë një produkt, mund të themi se pak vend i ka mbetur marketingut tradicional. Prandaj, rrjetet sociale kanë sjellë me vete një periudhë të re ne këtë fushë. Megjithëse mundohemi t’i bëjmë të gjitha vet, sigurisht që fokusi ynë është tek shitja online nëpërmjet rrjeteve sociale” Një ekip jo shumë i madh por shumë i talentuar dhe i dedikuar, me punën e tyre tashmë kanë arritur të shtrihen edhe në Shqipëri dhe Maqedoni. Agnesa thekson se në punën e saj të përditshme më së shumti e shijon punimin e thasëve për fëmijë, kjo ngase aty mund të shpalosë kreativitetin e saj.  Këta thasë të cilët karakterizohen nga dy ose më shumë nuanca ngjyrash janë bërë shumë të dashur për fëmijët. Ata kanë mundësinë t’i personalizojnë këta thasë me personazhet që pëlqejnë më shumë. E gjithë kjo punë, biznesit “ThesQefi” i ka siguruar edhe shumë bashkëpunimeafatgjata. “Bashkëpunimet me kopshtet, na kanë bërë më të vendosur për të punuar me shumë me targetin e fëmijëve pasi reagimi i tyre vazhdon të jetë përherë impresiv” Krejt në fund, Agnesa Sekiraqa ka një këshillë për të gjithë ata që janë gati për t’u përfshirë në tregun e punës. “Zhvilloni sa më shumë aftësitë e juaja sipërmarrëse. Pavarësisht barrierave që mund të hasni, e rëndësishme është të filloni dicka nga e para sepse edhe rrugëtimet e gjata nisin me hapin e parë. Pra, përpiquni të nxirrni më të mirën nga vetja, duke e bërë atë që e doni më së shumti”.
Lexo më shumë
Shiko të gjithë artikujt

Testoje veten në fushën tënde

Konkurset e Fundit
Shiko të gjitha konkurset
Jeni kompani
dhe dëshironi t'i bashkoheni Akademisë së Punës?
Na kontaktoni
KosovaJob është rrjeti më i madh i punësimit në Kosovë, i çertifikuar nga Bureao Veritas me ISO 9001: 2015 për Menaxhimin e Cilësisë.