Pse është i rëndësishëm një analist e të dhënave të BNj në një kompani?

12 Janar '24

	 	 
Analisti i të Dhënave të Burimeve Njerëzore është një pozitë e cila mundëson mbledhjen, organizimin dhe interpretimin e të dhënave për të kuptuar tendencat në punësim, praktikat e punësimit dhe pajtueshmërinë ligjore. Kjo pozitë është integruar brenda Departamentit të Burimeve Njerëzore në kompaninë IPKO. Arta Koka-Grubi - udhëheqëse e Departamentit të BNj në kompaninë IPKO ka treguar në një intervistë për AkademiPune se nevoja për këtë pozitë erdhi gjatë kohës së pandemisë dhe kjo ka ndikuar shumë në vendimmarrjen e tyre dhe planet e së ardhmes për të krijuar strategji më të mira të biznesit. Këtë hap deri tani, Arta e vlerëson transformues dhe nëse do të kishte një vlerë matëse nga 1 deri në 10, ajo do ta vlerësonte me 10.
AkademiPune: A na tregoni fillimisht më shumë për pozitën “HR Data Analyst”, çfarë nënkupton kjo?
Arta Koka Grubi: Në përgjithësi, HR Data Analyst apo Analisti i të Dhënave të Burimeve Njerëzore luan një rol vendimtar në mbledhjen, organizimin dhe interpretimin e të dhënave për të kuptuar tendencat në punësim, praktikat e punësimit dhe pajtueshmërinë ligjore. Megjithatë, në IPKO, ne synojmë të maksimizojmë potencialin e kësaj pozite përtej gjenerimit të raporteve. Respektivisht, Analisti i të Dhënave të Burimeve Njerëzore raporton apo  ofron të dhëna të vlefshme mbi stafin, si rekrutimin, planifikimin e buxhetit dhe vlerësimin e performancës së punonjësëve. Mirëpo, për më shumë, tek ne Analisti i të Dhënave propozon politika për të përmirësuar kulturën tonë të punës dhe proceset e menaxhimit të burimeve njerëzore në përgjithësi. Këto raporte të detajuara dhe propozime ofrohen menaxherëve tanë të lartë për të përafruar të dhënat e burimeve njerëzore me objektivat afatgjata të kompanisë sonë.

AkademiPune: Prej kur keni integruar këtë pozitë në departamentin tuaj të Burimeve Njerëzore?
Arta Koka-Grubi: Unë fillova të kuptoj rëndësinë e analizës së të dhënave të burimeve njerëzore brenda departamentit tonë gjatë pandemisë. U bë e qartë se ekipi ynë i BNj’së nuk përdorte analizën e të dhënave për vendimmarrje. Kjo situatë më shtyu të kuptoj se si të dhënat e burimeve njerëzore mund të ndikojnë ndjeshëm në vendimet e strategjisë së biznesit. Pra, sfidat e sjella nga pandemia theksuan domosdoshmërinë imediate për analitikën në përgjithësi, duke çuar në një theks të shtuar në qasjet e drejtuara nga të dhënat brenda departamentit të burimeve njerëzore.
AkademiPune Si e ka ndihmuar kjo kompaninë “IPKO” dhe cilat procese i ka lehtësuar më së shumti?
Arta Koka-Grubi: Zbatimi i analizës së të dhënave në IPKO ka ndikuar ndjeshëm në operacionet tona ditore si dhe strategjitë afatgjate. Metodat tradicionale të burimeve njerëzore, të mbështetura në instinkt, u zëvendësuan me vendimmarrje të drejtuar nga të dhënat. Ky ndryshim mundësoi IPKO-n të marrë vendime të mirë-informuara bazuar në dëshmi konkrete. Përdorimi i analitikës së burimeve njerëzore mundësoi IPKO-n të parashikoj edhe më mirë planet buxhetore, përgaditë përshkrimet e punës, ofroj mundësi të  mundshme të kursimit dhe përmirësimit të proceseve në përgjithësi.
Besoj se katër veçoritë kryesore mund ta ilustrojnë këtë transformim:

Analiza gjithëpërfshirëse e mangësive të aftësive: Duke përdorur algoritme të avancuara, analitika e burimeve njerëzore identifikoj me saktësi boshllëqet e aftësive brenda ekipeve tona. Duke krahasuar aftësitë ekzistuese me ato të kërkuara, ne planifikuam strategji për të kapërcyer këto boshllëqe. Më saktësisht, Analiza e të dhënave identifikoi dy grupe të punonjësëve; punonjësit të cilët kishin të mangët disa aftësi apo shkathtësi të nevojshme për punë, si dhe punonjësit të cilët posedonin këto aftësi. Kjo pasqyrë na fuqizoi të krijonim trajnime të brendshme të përshtatura nevojës së punonjësëve, duke përdorur transferimin e njohurive nga brenda, për të rritur performancën, optimizuar burimet e brendshme dhe arritur qëllimet organizative. Pra, ky process na ndihmon në zhvillimin e brendshëm të talenteve dhe reduktimin e kostove të rekrutimit. Për më shumë, adresimi i këtyre mospërputhjeve përmirëson angazhimin dhe moralin e punonjësve.
Angazhimi i punonjësve: Analizat e sondazheve të punonjësve apo feedback-u i tyre kanë identifikuar faktorët që ndikojnë në angazhimin e punonjësve. Këto analiza kanë dhënë njohuri departamentit të BNJ’së si dhe menaxherëve e IPKO’s në përgjithësi mbi nevojat apo nismat për të përmirësuar ambinetin e punës dhe rritjen e angazhimit të punonjësëve në kompani.
Dinamika e fuqisë punëtore: Për më tepër, qasja jonë në të dhënat gjithëpërfshirëse të dinamikës së fuqisë punëtore ka ndihmuar në identifikimin e departamenteve me qarkullim më të lartë dhe për të kuptuar shkaqet kryesore të largimit të tyre. Këto të dhëna kanë ndihmuar në përmirësimin e procesve dhe politikave të brendshme, në zhvillimin e strategjisë për të trajtuar çështjet mbi mbajtjen e punonjësëve në kompani dhe përmirësimin e ambientit të punës në përgjithësi.
Menaxhimi i performancës: Analiza e të dhënave të performancës ka identifikuar punonjësit me performancë të lartë si dhe fushat për përmirësim. Ky process ka dhënë njohuri për rafinimin e proceseve të menaxhimit të performances së punonjësëve.


AkademiPune: Si ndikon kjo pozitë për të pasur një pasqyrë më të mirë të spektrit të punësimit brenda kompanisë?
Arta Koka-Grubi: Kjo pozitë ofron një kuptim gjithëpërfshirës të fuqisë sonë punëtore përmes njohurive të drejtuara nga të dhënat. Ne kemi analizuar qarkullimin, normat e mbajtjes, performancën, benefitet, menaxhimin e kohës, pushimet dhe shumë çështje tjera. Këto njohuri ofrojnë një pamje parashikuese, duke na ndihmuar të adresojmë në mënyrë proaktive sfidat tona. Në përgjithësi, kjo qasje gjithëpërfshirëse mbështet vendimmarrjen dhe ndërhyrjet e përshtatura në të gjithë spektrin tonë të punësimit.
AkademiPune: Nga ajo që keni parë deri më tani, sa mendoni që është e rëndësishme një pozitë e tillë edhe për kompanitë e tjera?
Arta Koka-Grubi: Të kuptuarit e pikave të forta dhe të dobëta të punonjësve kanë vlerë të jashtëzakonshme për kompaninë, veçanërisht në këto kohë të pasigurta. Kjo pozitë mundëson departementin e burimeve njerëzore të përgatitet për çdo sfidë që kompania mund të hasë. Pra, kjo pozitë informon drejtuesit e organizatës nëse praktikat apo politikat e BNJ duhet të mbahen, hiqen ose modifikohen. Nëse do ta vlerësoja rëndësinë e kësaj pozite në një shkallë nga 1 në 10, do të thoja me siguri se është 11.

AkademiPune: Çfarë dhe ju vetë keni mësuar nga ajo që është implementuar nga punët që janë realizuar në këtë pozitë?
Arta Koka-Grubi: Si Drejtuese e Burimeve Njerëzore, duke integruar një ekspert në analizën e të dhënave në departamentin tonë ka qenë vërtet transformuese. Një nga mësimet më domethënëse që kam marr është rëndësia kryesore e vendimmarrjes së drejtuar nga të dhënat në formësimin e strategjive të menaxhimit të burimeve njerëzore. Analiza e të dhënave të burimeve njerëzore ka dhënë njohuri në përsosjen e qasjeve tona për rekrutimin, si dhe mbajtjen e zhvillimin e talenteve, duke na mundësuar të marrim vendime më të informuara dhe strategjike. Eksplorimi i të dhënave të burimeve njerëzore ka hedhur gjithashtu dritë mbi potencialin e analitikës parashikuese. Na ka fuqizuar të parashikojmë tendencat e ardhshme, duke na lejuar të adresojmë në mënyrë proaktive sfidat e mundshme përpara se ato të ndikojnë në operacionet tona. Kjo pozitë ka lehtësuar zbatimin e strategjive të synuara për të përmirësuar ambientin e punës dhe produktivitetin e punonjësve, gjë që është thelbësore për suksesin e qëndrueshëm dhe zhvillimin organizativ.

AkademiPune: Çfarë prisni tutje të integroni brenda kompanisë IPKO?
Arta Koka-Grubi: Në të ardhmen, departamenti ynë i burimeve njerëzore ka plane të shumta. Sidoqoftë, dy procese kryesore që dallohen, duke shfrytëzuar ekspertizën e një analisti të të dhënave, përfshijnë:

Rritja e fokusit në matjet e përvojës së punonjësve gjatë punës:Metrikat përfshijnë aspekte të ndryshme të punonjësve, duke përfshirë kënaqësinë në punë, ekuilibrin punë-jetë, shëndetin mendor, benefitet dhe angazhimin. Përdorimi i analitikës së të dhënave për të gjurmuar dhe analizuar këto cështje kyqe do të na mundësoj përmirësimin e praktikave të burimeve njerëzore dhe të nxis një kulturë më të favorshme në vendin e punës.
Inkorporimi i të dhënave të mediave sociale për rekrutimin:  Me shfrytëzimin e  analitikës së të dhënave, ne mund të analizojmë në mënyrë efektive të dhënat e mediave sociale për të identifikuar kandidatët e mundshëm, për të vlerësuar brendin e punonjësve dhe për të vlerësuar ndikimin dhe suksesin e fushatave tona të mediave sociale./ AkademiPune