Si të fitoni besimin e shefit dhe kolegëve në 90 ditët e para?

8 Gusht '25

	 	 
Mënyra se si e filloni një punë të re mund të përcaktojë përvojën tuaj të përgjithshme në një kompani, duke përfshirë marrëdhëniet që ndërtoni dhe mundësitë që ju dalin në të ardhmen.
Kjo është arsyeja pse të qenit strategjik për 90 ditët e para është thelbësore, thotë Donna Morris, nënkryetare ekzekutive dhe drejtoreshë e personelit në Ëalmart. Morris ka qenë në nivelin C për gati 10 vjet dhe ka mbajtur role në nivel ekzekutiv që nga viti 1998.
Morris thotë se suksesi i saj është pjesërisht për shkak të përkushtimit të tre muajve të parë në një punë të re ndaj komunikimit dhe qartësisë - dhe ajo rekomandon që të tjerët të bëjnë të njëjtën gjë.
"Në 90 ditët e para, bëni sa më shumë që të jetë e mundur për të kuptuar vërtet me kë do të punoni, si punojnë ata dhe çfarë pritet", thotë Morris.
Kjo do të thotë të shfrytëzoni aftësitë tuaja ndërpersonale dhe t'i pyesni shefin, menaxherët dhe kolegët tuaj jo vetëm për punët dhe përgjegjësitë e tyre, por edhe se kush janë ata dhe si shfaqen më mirë në punë.
Dëgjimi aktiv i përgjigjeve të tyre mund t'ju ndihmojë të jeni më të pëlqyeshëm dhe me ndikim në vendin e punës, dhe t'ju bëjë të dukeni më të zgjuar, tha së fundmi për CNBC Make It profesoresha e asociuar e Universitetit të Harvardit, Alison Wood Brooks.
"Më e rëndësishmja, sigurohuni që e kuptoni se çfarë është puna juaj dhe çfarë pritet prej jush. Tingëllon si një [ide] bazë, por është shumë e rëndësishme," thotë Morris. "Dhe për të shkuar pak më tej, merrni atë që keni kuptuar si atë që pritet prej jush, shkruajeni dhe ndani me menaxherin tuaj, dhe sigurohuni që të dy jeni në harmoni”, shton tutje ajo.
Këshilla e Morris vjen teksa punëtorët ndihen gjithnjë e më të shkëputur nga shefat e tyre. Gati 50% e punonjësve thonë se shefat e tyre nuk i kuptojnë ata ose punët e tyre, sipas Anketës së Hendekut të Perceptimit në Vendin e Punës të prillit 2025 nga platforma e burimeve njerëzore The Predictive Index, e cila mori në mostër 1,000 punëtorë në industri, grupmosha dhe nivele pune të ndryshme.
Rezultati: 44% e punonjësve thanë se ishin anashkaluar për rritje page ose projekte të mëdha dhe emocionuese sepse shefi i tyre nuk e kuptonte fushëveprimin e rolit të tyre, aftësitë e tyre dhe zakonet e tyre të punës, si p.sh. mënyrën se si i përfundojnë me sukses detyrat ose organizojnë informacionin. Dhe 48% thanë se udhëheqësit dhe menaxherët e tyre rregullisht i nënvlerësonin kontributet e tyre, duke çuar në ndjenja të pamjaftueshmërisë dhe dyshimit në vetvete.
Ky keqkomunikim mund të shmangej nëse punonjësit dhe shefat do të diskutonin herët pritjet, stilet e punës dhe qëllimet. Nuk keni nevojë të keni një karrierë dhjetëvjeçare për të zhvilluar këto biseda - edhe praktikantët dhe bashkëpunëtorët duhet të bëjnë më shumë se ç'duhet për t'u siguruar që 90 ditët e tyre të para në një punë të re janë produktive. Kjo ju ndihmon të nxirrni vetëbesim dhe të lini një përshtypje të mirë, thotë Morris./ AkademiPune