IPKO është kompani telekomunikacioni, e themeluar në vitin 1999 dhe njihet si kompania me rritjen më të shpejtë në Evropë. Nga ofruesi i parë i internetit në mbarë Kosovën, IPKO është kthyer në një ndërmarrje moderne që ofron një mori shërbimesh dhe përmbajtjesh të integruara në komunikime mobile, telefoni fikse, televizion kabllor digjital, internet dhe media.
Gjatë një viti operimi, IPKO ka arritur të mbulojë me rrjetin e telefonisë mobile, më shumë se 99.7 për qind të popullatës së vendit. Për më pak se një vit, telefonia mobile IPKO ka 35 për qind të tregut të telefonisë mobile në Kosovë, çka gjithnjë është në rritje. IPKO ka mbulueshmërinë më të madhe të rrjetit 3G/4G dhe WiFi në Kosovë.
Shërbimi i internetit tani ofrohet në të gjitha qytetet dhe qytezat e Republikës së Kosovës, ku kompania IPKO ka ndërtuar mbi 230 mijë porte, që mundësojnë kyçjen e po këtij numri të familjeve kosovare në shërbimet e internetit, telefonisë fikse dhe të televizionit digjital.
Në vitin 2018, IPKO Telecommunications, lansoi një pilot projekt në fushën e bujqësisë dhe teknologjisë informative. Në kuadër të këtij projekti u vendosën 16 stacione agrare në zona të ndryshme të Kosovës dhe një numër i konsiderueshëm i fermerëve janë duke pranuar SMS në telefonat e tyre lidhur me kushtet agrologjike për kultivimin e kulturave të tyre bujqësore. Një stacion agrar ju dhurua si donacion edhe Fakultetit të Bujqësisë në Universitetin e Prishtinës.