Celonis është lider global në fushën e Process Mining, teknologji kjo e cila mundëson transformimin e bizneseve duke i bërë proceset e tyre më efikase dhe transparente.
Shumica e proceseve brenda kompanive, drejtohen pothuajse plotësisht nga sisteme të ndryshme të IT-së ku lihen gjurmë digjitale të cilat përmbajnë të dhëna me vlerë për t’u eksploruar.  Teknologjia e Celonis i mundëson klientit ta ngarkojë historinë e të gjitha këtyre të dhënave duke e nxjerrë në pah rrjedhën aktuale të procesit dhe njëkohësisht identifikon devijimet të cilat ndodhin gjatë një procesi. Në tërësi, ky është edhe qëllimi i teknologjisë Process Mining që qëndron prapa produktit të Celonis Intelligent Business Cloud. 
Kompania Celonis është e përkushtuar në rritjen dhe shfrytëzimin e potencialit të zhvilluesve kosovar në transformimin e proceseve të kompanive në mbarë botën. 
Për një vit me radhë, për çdo muaj Celonis organizon “Developer Meetup@Celonis”, ngjarje kjo e cila ka për qëllim diskutimin e temave dhe punëtorive të ndryshme teknologjike. Ndërkaq si një mundësi shumë e mirë dhe ideale për të rinj të cilët kanë njohuri të mjaftueshme në programim dhe dëshirojnë që t’i ngrisin ato, Celonis ofron Path to Excellence (P2E) - program edukativ i mbështetur me punë praktike dhe mentorship. 
Qëllimi i këtij programi është aftësimi i të rinjve në teknologjitë me të cilat kompania punon dhe që pas përfundimit të trajnimeve dhe periudhës provuese të bëhen pjesë e kompanisë.