Si duhet të visheni në një intervistë pune?

22 Nov, 2019

Si duhet të visheni në një intervistë pune?
	 	 

Ndonëse për shumë njerëz veshëmbathja në një intervistë pune nuk përbën diçka të një rëndësie të veçantë, ndër përshtypjet e para të një punëdhënësi është edhe stili i veshjes. 

Kësisoj, krahas aftësive profesionale, veshja luan një rol të rëndësishëm po ashtu. Ka shumë opsione të cilat mund t'i konsideroni për t’i veshur në një intervistë pune, varësisht prej kompanisë ku keni aplikuar.

Në vazhdim, ne ju sjellim disa sugjerime se çka mund të vishni në një intervistë pune:

  • Veshje profesionale. Për burrat, kjo mund të nënkuptojë kostum - setër dhe pantallona, një këmishë dhe kravatë. Për gratë, një bluzë dhe pantallona më zyrtare apo ndonjë fustan.

Pavarësisht gjinisë, do të duhej t’i kushtoni rëndësi edhe ngjyrave që përzgjedhni për veshjen në intervistë. Shmangni gjithçka që mund të jetë shumë e ndritshme.

  • Veshje e thjeshtë. Nëse keni aplikuar në një mjedis jo shumë zyrtar, atëherë ju mund të përzgjedhni veshje të cilat janë më pak zyrtare, krahasuar me kostumet por patjetër që duhet të jenë më profesionale se sa një maicë apo sandale.

Është mirë që të dini pak edhe për kodin e veshjes. Nëse nuk jeni të sigurtë, lexojeni edhe njëherë profilin e kompanisë në të cilën keni aplikuar. Kështu, ju do të orientoheshit më saktë rreth asaj se çfarë duhet veshur. 

Për burrat:

  • Kostum me ngjyra të mbyllta si e zezë apo e hirtë
  • Këmishë me mëngë të gjata, me ngjyrë të bardhë ose e kombinuar me kostumin
  • Rrip lëkure
  • Kravatë
  • Çorape të errëta dhe këpucë lëkure

Per gratë:

  • Veshje me ngjyrë të zezë ose gri 
  • Kostume nën gjunjë
  • Bluzë të kombinuar me kostumin
  • Këpucë më zyrtare
  • Grim të lehtë (nëse përdorni)
  • Jo shumë bizhuteri

Si ndikon ana e jashtme në një intervistë pune?

Me anën e jashtme nënkuptohet ndikimi që veshëmbathja e kandidatit ka tek intervistuesit në mënyrë direkte. Veshëmbathja e duhur për një intervistë pune kryesisht varet nga pozita dhe kompania në të cilën keni aplikuar, mirëpo ajo mund të varet edhe nga faktorë tjerë si stina apo edhe preferencat tuaja.

Nëse keni aplikuar në ndonjë kompani që merret me fushat si: kontabiliteti, drejtësia, punët qeveritare, banka, etj, veshëmbathja juaj në intervistë duhet të jetë serioze. Mirëpo, nëse p.sh jeni artist , atëherë nuk është e nevojshme të shkoni me një kostum. 

Si ndikon ana e brendshme në një intervistë pune?

Rrobat që ju përzgjedhni për t’i veshur në një intervistë pune tregojnë po ashtu edhe: 

  • Profesionalizëm. Kur i kushtohet rëndësi veshjes në detaje, kandidati arrin të përçojë tek punëdhënësi mesazhin se i njeh normat dhe është i gatshëm t’i pranojë rregullat e punës.
  • Vetëbesim. Veshëmbathja ka ndikim të madh në mendjen dhe në nivelin e rehatisë tuaj gjatë intervistës. Kur ndjeheni rehat në veshje, vetëbesimi mund të jetë më i lartë. Nëse ju keni vetëbesim dhe ndjeheni rehat me veshjen tuaj, zgjedhja e veshjes nuk do të ketë shumë rëndësi, për shkak se ju do transmetoni energji dhe pozitivitet dhe karakteri juaj do të jetë ai i cili do të tërheqë vëmendjen e intervistuesve.
  • Respekt. Veshja e duhur në një intervistë pune tregon që kandidati përpos aftësive profesionale, i njeh rregullat dhe standardet e kompanisë dhe do ta respektojë kompaninë si edhe klientët.

Gjithsesi, rehatia juaj me veshjen ka më shumë rëndësi se veshja specifike të cilën mund ta përzgjedhni. 

Fillo Kuizin
Testojeni veten, mësoni më shumë dhe argëtohuni në të njejtën kohë nëpërmjet kuizeve që ofrojmë ne për ju.
  • Qyteti në të cilin ndodhet muzeu më i madh në botë.
    ARSIPI
  • Ky qytet ndryshe njihet edhe si “Qyteti që nuk fle kurrë”.
    JON RUJK
  • Qytet bregdetar në Spanjë.
    LAVNECAI
  • Në këtë qytet numri i biçikletave është më i madh se numri i banorëve.
    SADMATREM
  • Në këtë qytet u hap Muzeu i Literaturës në vitin 2019.
    LUDNIB
  • Qytet që mban të njëjtin emër sikur shteti.
    KULMESRUGB
  • Ky është qyteti i vetëm ku janë organizuar lojërat olimpike verore 3 herë.
    NADLOR
  • Ky është qyteti që shtrihet në 2 kontinente, Azi dhe Evropë.
    MATLOBLIS
  • Qyteti me më së shumti banorë në botë.
    KOTOI
  • Kryeqyteti i Sllovakisë.
    LVALASITBAR
1
/
10
ARTIKUJ TË NGJASHËM
Tiparet që kanë punonjësit e dalluar
Të gjithë e kemi një koleg në punë që është më i dalluar, më energjik, më i motivuar si dhe që posedon tipare që e veçojnë nga të tjerët. Në një studim të realizuar me anë të një pyetësori u intervistuan më shumë se 500 udhëheqës biznesi, të cilët u pyetën se si e dallojnë një punonjës nga të tjerët. Hulumtuesit kërkuan ta dinë pse disa njerëz janë më të suksesshëm se të tjerët në vendin e punës. Përgjigjet ishin mjaft befasuese pasi udhëheqësit zgjodhën “personalitetin” si arsyen kryesore.Posaçërisht, 78% e udhëheqësve theksuan se personaliteti është mënyra që veçon punonjësit e dalluar, shifër kjo më e lartë se sa përshtatja kulturore me 53% si dhe më e lartë se sa shkathtësitë e punonjësit 39%. Personaliteti përbëhet nga një sërë preferencash dhe prirjesh të qëndrueshme, e që janë faktorë mjaft të rëndësishëm pasi paraqesin mënyrën e qasjes sonë karshi botës.Tiparet e personalitetit formohen në një moshë të re dhe zhvillohen në fazat e para të moshës madhore. Gjatë jetës suaj ju pësoni shumë ndryshime, mirëpo personaliteti nuk është njëra prej tyre. Akademi Pune ju sjell disa nga tiparet që kanë punonjësit e dalluar: Gjithmonë kërkojnë më shumë Punonjësit e dalluar kanë bindjet e tyre se gjithmonë mund të arrijnë rezultate më të mira. Pavarësisht rezultateve pozitive që i arrijnë, punonjësit e dalluar janë të uritur për përmirësim, pasi që kanë mentalitetin fitues dhe bindjen se kësisoj kanë arritje më të mëdha si personale ashtu edhe profesionale. I menaxhojnë me qetësi mosmarrëveshjet Ata reagojnë me maturi në raste mosmarrëveshjesh me kolegët në punë. Gjithashtu vetëpërmbahen përderisa sqarojnë pikëpamjet dhe idetë e tyre. Nuk reagojnë me vrull në rast se ndihen të rrezikuar, i evitojnë pengesat me lehtësi pasi që në mendjen e tyre kanë qëllime të mëdha. Kontrollojnë egon e tyre Punonjësit në fjalë nuk i kushtojnë shumë rëndësi egos së tyre, sidomos kur është fjala për përmirësimin e punës në grup. Ata janë në gjendje ta pranojnë gabimin si dhe të gatshëm ta vazhdojnë punën duke përkrahur idenë e tjetrit. Kësisoj, ruhet edhe harmonia brenda ekipit të punës. Janë të përgjegjshëm Tipari që e veçon një punonjës të dalluar është marrja e përgjegjësisë kur është nevoja. Ata e zotërojnë punën e tyre, vendimet e tyre, si dhe marrin përgjegjësi për rezultatet e punës së tyre, qoftë ato pozitive apo negative. Janë të guximshëm Pa dyshim se një punonjësi të dalluar nuk mund t’i mungojë guximi dhe vetëbesimi. Punonjësit e dalluar nuk hezitojnë t’i shprehin mendimet e tyre, të bëjnë pyetje apo edhe ta sfidojnë ndonjë vendim të marrë nga anëtarët e tjerë. Kësisoj, ata tregojnë se sa të guximshëm janë dhe se janë të gatshëm që në të ardhmen të marrin vendime të rëndësishme për kompaninë.
Lexo më shumë
Kthimi në punë përderisa pandemia ende nuk ka përfunduar
Pandemia dhe pasojat e saj do të jenë një nga sfidat më të mëdha të biznesit të kohës sonë. Për të vazhduar operacionet duke minimizuar rrezikun për punonjësit, shumica e kompanive kanë përshtatur mënyra të reja të punës nga shtëpia varësisht nga natyra e punës.Askush prej nesh me të vërtetë nuk e di se si do të duket jeta jonë kur gjërat fillojnë të kthehen në "normalitet". Një gjë duket e sigurt, puna do të duket ndryshe për një kohë.Punëdhënësit dhe menaxherët mbajnë përgjegjësinë kryesore për të drejtuar kompanitë e tyre përmes kësaj kohe. Varet nga ata që të përcaktojnë se si dhe kur të fillojnë detyrën komplekse të kthimit në vendin e punës pasi të jenë larguar në tërësi kufizimet e qeverisë.A do të praktikohet distanca sociale? Shëndeti dhe siguria e punonjësve duhet të jetë prioritet i kompanive. Kjo natyrisht se është një shqetësim moral, etik dhe ligjor për të gjitha kompanitë. Nga këndvështrimi i biznesit, mbrojtja e mirëqenies së punonjësve është thelbësore sepse asnjë plan për të rifilluar operimet normale nuk mund të ketë sukses pa ta. Punonjësit padyshim se llogarisin në kompanitë e tyre për t'i ndihmuar të rikthehen në punë pa rrezikuar shëndetin e tyre. Përderisa kufizimet e lëvizjes po zbuten, kompanitë do të duhet të kuptojnë dhe zbatojnë pajtueshmërinë me urdhrat e pushtetit lokal si dhe atij qendror. Meqenëse këto rregulla ndryshojnë sipas vendndodhjes dhe ndoshta nuk do të jenë të aplikueshme njëzëri, drejtuesit e kompanive duhet të planifikojnë një varg metodash bazuar në natyrën e punës dhe vendin ku zhvillohet puna. Tranzicioni nga puna prej shtëpisë në atë nga zyrja Si punëdhënësit ashtu edhe punonjësit nuk do ta kenë të lehtë deri sa të stabilizohen dhe t’i kthehen punës siç ka qenë para përhapjes së pandemisë. Ja disa këshilla se si menaxherët mund të përballen me këtë ndryshim: Keni durim dhe fleksibilitet. Ka gjasa që ekipi juaj të ndihet i stresuar, qoftë për t'u rikthyer në zyrë ose për sfida më të përgjithshme, të shkaktuara nga pandemia. Ndihmoni dhe inkurajoni ekipin tuaj që ta ketë sa më të lehtë ta rifillojë punën. Krijoni një plan të detajuar. Punonjësit tuaj duan të dinë se çfarë të presin në të ardhmen. Krijoni një plan që përshkruan në detaje se si do të vazhdojnë detyrat në terma afatshkurtër dhe afatgjatë. Bëni këtë plan të disponueshëm për ekipin tuaj dhe përgjigjuni pyetjeve që mund të kenë ndaj jush. Vendosni pritshmëri të qarta për udhëzime dhe rregullore të reja. Sigurohuni që ekipi juaj të jetë i vetëdijshëm dhe t'i përmbahet masave të sigurisë dhe rregullave të reja. Ato duhet të komunikohen qartë dhe rregullisht në mënyrë që të gjithë të jenë të përditësuar me informatat e fundit. Si duhet të përballen punonjësit me situatën e re?Mos nxitoni nëse nuk jeni gati fizikisht ose emocionalisht. Siç diskutuam më lart, ekzistojnë arsye të ndryshme që mund t'ju bëjnë që ende mos jeni në gjendje të ktheheni në punë brenda zyrës. Komunikoni me menaxherin tuaj ose departamentin e HR për të diskutuar një plan veprimi të përshtatshëm. Qëndroni të kujdesshëm kur bëhet fjalë për procedurat e reja të sigurisë. Mos u shqetësoni për praktikat higjienike të sugjeruara. Ju jeni më të sigurtë përderisa vazhdoni t’i zbatoni rregullat si mbajtja e distancës dhe higjienës. Komunikoni qartë dhe shpesh. Sigurohuni që ju dhe menaxheri juaj keni komunikim të vazhdueshëm në lidhje me nevojat tuaja të punës. Nëse gjatë kësaj kohe keni nevojë për fleksibilitet mos hezitoni ta njoftoni. Thënja se ne jemi të gjithë së bashku kundër kësaj pandemie është përmendur disa herë, prandaj duhet të vazhdojmë ta përkrahim njëri tjetrin që ta tejkalojmë këtë situatë kritke. Mbështetuni në rrjetin tuaj të njerëzve dhe burimeve për t'ju ndihmuar ta keni sa më të lehtë kalimin përsëri në zyrë./AkademiPune
Lexo më shumë
Çka është një letër dorëheqjeje dhe pse duhet ta shkruajmë?
Nëse keni vendosur të largoheni nga një vend pune, pavarësisht rrethanave, konsiderohet shumë profesionale ta shkruani një letër dorëheqjeje që t’ia dërgoni punëdhënësit aktual. Duke dërguar një letër dorëheqjeje, ju do të lini hapësirë edhe për bashkëpunime të tjera të mundshme në të ardhmen. Çka nënkupton dorëheqja? Dorëheqja është një akt i njëanshëm i punëmarrësit, e cila nënkupton ndërprerjen e marrëdhënies së punës, me ç'rast punëmarrësi duhet t’i specifikojë arsyet e ndërmarrjes së një veprimi të tillë. Çka është një letër dorëheqjeje? Një letër dorëheqje nënkupton shprehjen e dëshirës për t’u larguar nga një vend pune, institucion ose kompani e caktuar. Në këtë letër, duhet të elaborohen arsyet se pse personi po largohet nga ai vend pune. Pse duhet të shkruhet letra e dorëheqjes? Letra e dorëheqjes duhet të shkruhet ngase nënkupton një formë profesionale të largimit nga puna, pavarësisht vendit ose pozitës së punës. Në rast se punëmarrësi me vullnet të tij dëshiron ta shkëpusë marrëdhënien e punës, ai duhet çdoherë ta njoftojë punëdhënësin lidhur me arsyet e shkëputjes së marrëdhënies së punës brenda një afati të arsyeshëm kohor. Ky afat duhet të jetë i paraparë me ligj dhe kontratë të të punësuarit, me ç'rast edhe punëdhënësit i jepet mundësia e gjetjes së zëvendësimit për pozitën konkrete, brenda kohës së aryeshme. Çka duhet të përmbajë një letër dorëheqjeje? Një letër dorëheqjeje duhet të përmbajë: Deklaratën se do ta lini punën Titullin e pozitës suaj të punës Datën e fundit deri kur do te jeni në atë pozitë pune Mirënjohje për punëdhënësin tuaj Diçka nga përvoja në kompaninë e caktuar Ofertë për ta ndihmuar personin që do të vijë në pozitën e njejtë Të dhënat tuaja kontaktuese Shembull i një letre dorëheqjeje: Përshëndetje (emri dhe mbiemri i personit të cilit po i drejtoheni) Ju lutem pranoni këtë letër si njoftim për dorëheqjen time nga pozicioni  i (shkruani pozitën e punës të cilën e keni mbajtur) këtu në kompaninë (shkruani emrin e institucionit/kompanisë), me datën e fundit (shkruani datën e fundit deri kur mund të jeni pjesë e kompanisë). Kam vendosur të largohem për shkak se (cekni arsyen se pse po largoheni, mund të jetë kyçje në një projekt të ri ose ofertë tjetër e punës, planifikim i studimeve jashtë vendit, etj). Unë jam i gatshëm/ e gatshme për të ndihmuar në rekrutimin dhe trajnimin e personit që do të më zëvendësojë dhe do të sigurohem që të gjitha këto të kryhen para largimit tim, që të mos shtyhet as edhe një proces brenda kompanisë. Dua t’iu falenderojë shumë për qasjen e mirë dhe vlerësimin e punës sime. Kjo kompani me ka dhënë shumë dhe shpresoj që kjo ka qenë reciproke.  Pavarësisht largimit, nëse ndonjëherë ju konsideroni që unë mund të ndihmoj për të mirën e kompanisë qoftë edhe nga larg, ndjehuni të lirë të më kontaktoni. Ka qenë një kënaqësi e madhe të punoj me ju dhe të gjithë stafin dhe definitivisht do të doja të mbesim në kontakt. Çdo të mirë, (Emri dhe mbiemri juaj) (Të dhënat e kontaktit)
Lexo më shumë
SI TA RUAJMË VENDIN E PUNËS?
Puna nganjëherë mund të duket rutinë mirëpo mbetet diçka esenciale për sigurimin e mirëqënies dhe plotësimin e nevojave ekonomike për individin dhe familjen. Ruajtja e vendit të punës paraqitet si sfidë në vete dhe si rrjedhojë kërkon angazhim dhe performancë maksimale gjatë orarit të punës, e cila mëpastaj manifestohet në rezultate konkrete. Të ruash vendin e punës nënkupton koncentrim të mjaftueshëm psikik dhe fizik në mënyrë që punët të përfundojnë në mënyrën më të mirë dhe punëdhënësi të mbetet i kënaqur me detyrat e realizuara nga ana e punëmarrësit. Menaxherja e burimeve njerëzore në IPKO Telecommunications, Arta Koka Grubi, thotë se për të mbajtur vendin e punës dhe për t’u treguar i suksesshëm, punëtori duhet të japë maksimumin dhe të punojë drejt arritjes së qëllimeve sikur të ishte dita e fundit. Në një intervistë për KosovaJob, ajo ka thënë se ndër parimet kryesore të një punëtori duhet të jetë respektimi i orarit. Si komponent kyç për ta ruajtur punën, ajo e sheh fleksibilitetin e një punëtori. Kur një kompani ka nevojë për dikë që ta ndryshojë ndërrimin e punës, të punojë gjatë fundjavës, të punojë jashtë orarit ose të marrë përsipër detyra të reja, Koka-Grubi këshillon punëmarrësit që të shqyrtojnë mundësinë për t’u paraqitur vullnetarisht nëse kjo i përshtatet orarit personal të një individi.  “Mendimi im profesional është se për të pasur sukses, të gjithë ne duhet të punojmë me zell dhe me zgjuarsi. Njerëzit të cilët janë të suksesshëm në jetën e biznesit, në punë ose në një profesion zakonisht kalojnë nëpër kohë të vështira para se të mund të korrin frytet e suksesit. Për shembull, Kryeshefi Ekzekutiv i IPKO Telecommunications L.L.C., z. Robert Erzin, përveç se është shumë bashkëpunues, ka qëndrim pozitiv, është i zellshëm, në dispozicion për çdo çështje të kompanisë deri në orët e vona, ai është një nga personat e parë që paraqitet në punë në mëngjes. Megjithatë, punëtori duhet të jetë i zgjuar në caktimin e qëllimeve të tij/saj dhe të planifikojë si t’i arrijë ato qëllime. Përveç kësaj, secili punëtor duhet të ketë shprehi të mira pune dhe të jetë 100 përqind i besueshëm. Nëse dështojnë në këtë drejtim, asgjë tjetër nuk ka më vlerë! Punëtori duhet të paraqitet në punë me kohë, të ofrojë punë cilësore dhe të komunikojë me kolegët e tij/saj”, ka thënë ajo. Koka-Grubi thotë se për të arritur suksese duhet t’i jepet prioritet punës ngase asnjë plan nuk funksionon nëse nuk mësohemi t’i prioritizojmë gjërat. Prandaj, punëtorët duhet t’i trajtojnë objektivat e veta ditore me radhë. Ajo nënvizoi një tjetër cilësi të cilën e kërkojnë kompanitë e mëdha sot e që është të qenurit ‘lojtar i ekipit’. Sipas saj, secili punëtor duhet të bëhët punëtori që ja kalon mirë me të gjithë dhe komunikon mirë me të gjithë, që u ofron ndihmë kolegëve dhe që nuk bëhet pjesë e thashethemeve nëvend të punës. Ndërkaq, ajo çka vlerësohet më shumë tek një punëtor në IPKO janë disa virtyte që duhet t’i ketë secili individ që bëhët pjesë e këtij ekipi. Ndër to, Koka-Grubi përmend thjeshtësinë, kujdesin, mirësjelljen etj. Ajo thotë se ekipi i rekrutimit në IPKO përveç shkathtësive dhe arsimimit përkatës, kërkon punëtorë që kanë vlera personale, karakteristika dhe tipare të personalitetit që sjellin sukses. “Thjeshtësia dhe kujdesi është diçka që ne e vlerësojmë tek punëtorët, pasi që kjo përfshin disa nga vlerat e kompanisë sonë, ndërsa marrëdhëniet e mira ndërtohen mbi besimin. Punëdhënësit vlerësojnë punëtorët tek të cilët mund të kenë besim dhe të cilët e shfaqin besnikërinë e tyre ndaj kompanisë. Përveç kësaj, besueshmëria dhe përgjegjësia janë vlera të mëdha. Nuk ka dyshim se të gjithë punëdhënësit dëshirojnë që punëtorët e tyre të paraqiten në punë çdo ditë - me kohë - dhe të jenë të gatshëm për punë e të marrin përsipër përgjegjësinë për veprimet e tyre. Të jenë kontribues të përgjegjshëm e të besueshëm dhe të përkushtuar për përsosmëri dhe sukses. Mirësjellja është një tjetër tipar. Punëtorët që janë të sjellshëm, miqësorë, të butë dhe bashkëpunues me të tjerët vlerësohen shumë, pasi që puna në ekip është çelësi i suksesit të biznesit", theksoi ajo. Sipas saj, derisa puna në ekip përmendet gjithmonë si një shkathtësi e rëndësishme, njëlloj është edhe aftësia për të punuar në mënyrë të pavarur, me mbikëqyrje minimale dhe me vetë-motivim. Personi me motivim të jashtëzakonshëm është ai që ndërmerr iniciativën me mbikëqyrje minimale. Ajo thotë se të gjithë punëdhënësit kërkojnë punëtorë të cilët kërkojnë pak mbikëqyrje dhe udhëzime për ta kryer punën në kohën e duhur dhe në mënyrë profesionale. Ani pse është shumë e vështirë të merret vendimi për të shkarkuar një person nga puna, Koka-Grubi tha se kjo duhet bërë nëse atij apo asaj i janë dhënë mundësi të dyta për përmirësim por nuk i ka përfillur. “Nuk është e lehtë ta shkarkosh një person nga puna. Në fund të fundit, sipas Josh Bersin të Deloitte, koha për të arritur produktivitetin e plotë te një punëtor i ri është një deri në dy vjet, me një investim në trajnim deri në 20 përqind të pagës së punëtorit. Përveç nëse punëtorët nuk i shfrytëzojnë në mënyrë të duhur shkathtësitë dhe ekspertizën e tyre, ata duhet të jenë anëtarë produktivë të ekipit në një moment të caktuar. IPKO si kompani përdor një sistem progresiv të korrigjimit ku përmes trajtimit me gojë dhe me shkrim, i japim udhëzime dhe i japim një mundësi të dytë punëtorit që të përqendrohet në problemin e caktuar dhe ta rikthejë produktivitetin e vetë në punë. Megjithatë, nëse këtij personi i jepen shanse të dyta  gjithmonë, atëherë, mendojmë se është koha për ta shkarkuar atë person. Nëse një punëtor ka pasur kohë të mjaftueshme për të korrigjuar problemet, por nuk e ka bërë këtë, atëherë, ai ose ajo duhet të ndjekë mundësi të tjera të karrierës. Nuk ka asgjë më të keqe se kur detyrohesh ta largosh nga puna një punëtor. Sidoqoftë për pronarët e bizneseve, nuk ka asgjë më të rëndësishme sesa të heqin punëtorët të cilët janë pengues ndaj punëtorëve të tjerë produktiv dhe ndaj misionit të përgjithshëm të kompanisë”, ka thënë ajo. IPKO Telecommunications L.L.C, që aktualisht është investuesi i huaj direkt më i madh në Kosovë dhe punëson më shumë se 650 persona, vazhdimisht kërkon punëtorë që e duan atë që bëjnë dhe do të vazhdojnë përpjekjet derisa të zgjidhin problemin dhe ta përfundojnë punën që u është caktuar. Në këtë kompani mjedisi i punës është shumë miqësor dhe ka hapësirë ​​të mjaftueshme për të shfaqur kreativitetin dhe shkathtësitë. Si rezultat i gjithë kësaj, gjatë vitit 2018, IPKO është shpërblyer si “Punëdhënësi më i mirë i vitit”.
Lexo më shumë
KosovaJob është rrjeti më i madh i punësimit në Kosovë, i çertifikuar nga Bureao Veritas me ISO 9001: 2015 për Menaxhimin e Cilësisë.