ÇKA DUHET TË BËNI NËSE JENI PUSHUAR NGA PUNA?

16 Shtator '19

	 	 
Të pushohesh nga puna, mund të jetë shumë stresuese. Kur e merrni një lajm të tillë, mbase qysh në momentet e para do të dëshironi të largoheni nga zyra. Kjo, sepse humbja e punës mund t’iu ndikojë në shumë mënyra.
Në përgjithësi, gjithandej në botë ekziston një stigmë për njerëzit që janë pushuar nga puna, e kjo është akoma më e dukshme kur ndodhë në vendet e vogla, ku ka pak kompani që operojnë në treg dhe të cilat janë në kontakt me njëra-tjeren vazhdimisht.
Kështu që, nëse ndonjëherë gjendeni përballë një situate të tillë, kur punëdhënësi juaj ju thërret për t’ua kumtuar lajmin se jeni pushuar nga puna, është shumë e rëndësishme t’i keni parasysh disa gjëra dhe jo vetëm të dilni nga zyra.

Informohuni saktë. Kur merrni lajmin se punëdhënësi juaj dëshiron të shkëpusë marrëdhënien e punës me ju, sigurohuni t’i bëni pyetjet e duhura që t’i merrni faktet se pse ai ka ardhur deri tek një vendim i tillë. Pyeteni punëdhënësin tuaj: Pse jam pushuar nga puna sepse nuk dua t’i bëj gabimet e njejta në të ardhmen. Kështu, ju mund të analizoni se si ai i justifikon shkaqet në mënyrë që të përcaktoni saktë se a ka bazë vendimi i tij.
Diskutoni kushtet e largimit. Sigurohuni që para se të nënshkruani ndonjë dokument për ndërprerje bashkëpunimi, t’i analizoni mirë të gjitha aspektet. Sigurohuni që shkëputja e kontratës suaj ka bazë ligjore apo që kontrata nuk është shkëputur për arsye diskriminimi ose tjera. Kjo ngase varësisht nga rasti, juve mund t’u takojë dëmshpërblim.
Rregullojeni menjëherë CV-në tuaj. Asnjëherë nuk është fundi dhe asnjëherë nuk është vonë për të nisur diçka të re. Filloni të aplikoni për punë të tjera ku mund ta gjeni veten. Rregullojini të gjitha detajet, cekni edhe punën e fundit nga e cila jeni pushuar, si dhe të gjitha aftësitë që i keni fituar gjatë asaj kohe. Po ashtu, edhe çdo detaj tjetër të cilin nuk e keni pasur të nënvizuar në CV deri në atë moment.

Gjatë vitit 2018, një studim 10 vjeçar me më shumë se 2,600 drejtorë zbuloi se të gjithë ata individë që dikur u pushuan nga puna (91 përqind e tyre)  kishin gjetur një punë të mirë apo edhe më të mirë se ajo që kishin pasur më herët.  Ky studim u publikua në librin e titulluar “Dera tjetër e drejtorëve”.
Të largohesh nga puna nuk duhet të jetë diçka demoralizuese. Kjo duhet t’iu shërbëjë të reflektoni edhe me veten por edhe me ngjarjet përreth që mund të kenë shpierë deri tek pushimi nga puna. Cilado qoftë arsyeja e largimit tuaj, ju mund ta shihni anën e ndritshme të të gjithë ndodhisë dhe të jeni më të matur që në të ardhmen të mos lejoni të përsëriten situatat e ngjashme.